കളിതോറ്റതിന്റെ വൈരാഗ്യത്തിൽ അശ്ലീല ആംഗ്യം,  പാകിസ്ഥാൻ  കായിക താരത്തിനെതിരെ പ്രതിഷേധം

സോൾ: മത്സരം തോറ്റപ്പോൾ അശ്ലീല ആംഗ്യം കാണിച്ച പാക് കായിക താരത്തിനെതിരെ വിമർശനം. ദക്ഷിണ കൊറിയയിൽ നടന്ന ഏഷ്യൻ ജൂനിയർ സ്ക്വാഷ് ചാമ്പ്യൻഷിപ്പിനിടെ പാകിസ്ഥാൻ സ്ക്വാഷ് താരമായ മെഹ്‌വിഷ് അലിയാണ് തന്റെ മോശം പെരുമാറ്റത്തെ തുടർന്ന് വിവാദത്തിൽപ്പെട്ടത്.

പ്രീ-ക്വാർട്ടർ ഫൈനലിൽ ഹോങ്കോങ്ങിന്റെ ചുങ് വൈ എൽ 1-13, 5-11, 11-13, 4-11 എന്ന സ്‌കോറിന് പാക് താരത്തെ പരാജയപ്പെടുത്തുകയായിരുന്നു. ഇതിനു ശേഷം, ഷെയ്ക്ക് ഹാൻഡ് നൽകുന്നതിന് പകരം പാക് താരം അശ്ലീല ആംഗ്യമാണ് കാണിച്ചത്. പ്രീക്ക്വാർട്ടർ ഫൈനലിലെ കളിക്കളത്തിൽ വച്ചു തന്നെ ഹോങ്കോംഗ് താരം പ്രതിഷേധിച്ചതിനാൽ മെഹ്‌വിഷ് അലിക്കെതിരെ അച്ചടക്ക നടപടി എടുത്തേക്കുമെന്നാണ് വിവരം.

കളിക്കളങ്ങളിൽ മോശം പെരുമാറ്റങ്ങളുടെ പേരിൽ പാകിസ്ഥാൻ കായിക താരങ്ങൾ വിവാദത്തിലാകുന്നത് ഇതാദ്യമല്ല.മേയിൽ നടന്ന അണ്ടർ 16 ഡേവിസ് കപ്പ് മത്സരത്തിനിടെ സമാനമായ ഒരു സംഭവം ഉണ്ടായി. ഷെയ്ക്ക് ഹാൻഡ് നൽകാൻ പോയ ഒരു ഇന്ത്യൻ കളിക്കാരനെ പാകിസ്ഥാൻ കളിക്കാരൻ അടിച്ചതായിരുന്നു സംഭവം.