ഫോം വീണ്ടെടുക്കാന്‍ ഒരുങ്ങി പൃഥി ഷാ, രഞ്ജി ട്രോഫിയില്‍ ഇനി മഹാരാഷ്ട്രയ്ക്കായി കളിക്കും

മുംബയ് : മുന്‍ ഇന്ത്യന്‍ ക്രിക്കറ്റ് ടീം അംഗം പൃഥ്വി ഷാ ആഭ്യന്തര ക്രിക്കറ്റില്‍ മഹാരാഷ്ട്രയ്ക്ക് വേണ്ടി കളിക്കും. കഴിഞ്ഞ സീസണ്‍ വരെ മുംബയ് ടീമംഗമായിരുന്ന പൃഥ്വി ഫോം വീണ്ടെടുക്കാനായി ഇത്തവണ ടീം മാറാന്‍ തീരുമാനിക്കുകയായിരു ന്നു. 25കാരനായ പൃഥ്വി ഫോമില്ലായ്മയും മോശം ശീലങ്ങളും അടിപിടികളും കൊണ്ട് കുറച്ചുനാളായി വിവാദത്തിലായിരുന്നു.

2018ല്‍ വെസ്റ്റ് ഇന്‍ഡീസിനെതിരെ രാജ്‌കോട്ടില്‍ 18-ാം വയസില്‍ സെഞ്ച്വറി നേടിയാണ് പൃഥ്വി ടെസ്റ്റ് കരിയര്‍ ആരംഭിച്ചത്. എന്നാല്‍ ആകെ അഞ്ചുടെസ്റ്റുകള്‍ മാത്രമാണ് കളിക്കാന്‍ കഴിഞ്ഞത്. ഒരു സെഞ്ച്വറിയും രണ്ട് അര്‍ദ്ധസെഞ്ച്വറികളും ഉള്‍പ്പടെ 339 റണ്‍സ് സമ്പാദ്യം. 2020ലെ ഓസ്‌ട്രേലിയന്‍ പര്യടനത്തിലെ മെല്‍ബണ്‍ ടെസ്റ്റില്‍ ആദ്യ ഇന്നിംഗ്‌സില്‍ ഡക്കാവുകയും രണ്ടാം ഇന്നിംഗ്‌സില്‍ നാലുറണ്‍സിന് പുറത്താവുകയും ചെയ്തതോടെ ടെസ്റ്റ് കരിയര്‍ അവസാനിച്ചു. പരിക്കും ഒരു ഘടകമായി. ആറ് ഏകദിനങ്ങളിലും ഒരു ട്വന്റി-20യിലും ഇന്ത്യന്‍ കുപ്പായത്തില്‍ കളിച്ചിട്ടുണ്ട്. 2021 ജൂലായ് 25ന് ശ്രീലങ്കയ്ക്ക് എതിരായ ട്വന്റി-20യിലാണ് അവസാനമായി ഇന്ത്യയ്ക്ക് വേണ്ടി കളിച്ചത്. അന്ന് നേരിട്ട ആദ്യ പന്തില്‍ ഡക്കായി.

ആഭ്യന്തര ക്രിക്കറ്റില്‍ മുംബയ്ക്ക് വേണ്ടി കഴിഞ്ഞവര്‍ഷത്തെ സെയ്ദ് മുഷ്താഖ് ട്രോഫിയിലാണ് അവസാനമായി കളിച്ചത്. ഐ.പി.എല്ലില്‍ ഡല്‍ഹിക്ക് വേണ്ടി 79 മത്സരങ്ങളില്‍ നിന്ന് 14 അര്‍ദ്ധസെഞ്ച്വറികളടക്കം147.46 സ്‌ട്രൈക്ക് റേറ്റില്‍ 1892 റണ്‍സ് നേടിയിട്ടുള്ള ഷായെ കഴിഞ്ഞ താരലേലത്തില്‍ ഒരു ടീമും സ്വന്തമാക്കാന്‍ തയ്യാറായിരുന്നില്ല.