നവകേരള സദസ്സ്: മങ്കട ഗവ: ആശുപത്രി വികസനത്തിന് ഏഴ് കോടി രൂപ അനുവദിച്ചു

പെരിന്തൽമണ്ണ: മങ്കട ഗവ. ആശുപത്രി വികസനത്തിന് ഏഴു കോടി രൂപ സംസ്ഥാന സർക്കാർ അനുവദിച്ചു. 1961ലാണ് ആശുപത്രി ആരംഭിച്ചത്. ഇപ്പോൾ ഇത് കമ്മ്യൂണിറ്റി ഹെൽത്ത് സെന്റർ (സി.എച്ച്.സി) ആണ്. 2.08 ഏക്കർ സ്ഥലവും 10,​000 ചതുരശ്ര അടി വിസ്തീർണമുള്ള കെട്ടിടങ്ങളുമുണ്ട്. എന്നാൽ കാലപ്പഴക്കം മൂലം അൺഫിറ്റ് ആയതിനാൽ എട്ട് കെട്ടിടങ്ങൾ പൊളിച്ച് മാറ്റാൻ തീരുമാനിച്ചിട്ടുണ്ട്. മങ്കട, കൂട്ടിലങ്ങാടി, മക്കരപ്പറമ്പ്, കുറുവ, പുഴക്കാട്ടിരി, മൂർക്കനാട്, അങ്ങാടിപ്പുറം, പുലാമന്തോൾ എന്നീ ഗ്രാമപഞ്ചായത്തുകളിലെ 8 ആരോഗ്യ കേന്ദ്രങ്ങൾ (4 എഫ്. എച്ച്.സി, 2 സി.എച്ച്.സി, 2 പി.എച്ച്.സി) ഉൾപ്പെട്ട മങ്കട ഹെൽത്ത് ബ്ലോക്കിന്റെ ആസ്ഥാനം കൂടിയാണ് മങ്കട സി.എച്ച്.സി. ആശുപത്രി വികസനത്തിന്റെ ഭാഗമായി മൂന്നു നില കെട്ടിടം, ലിഫ്റ്റ്, പീഡിയാട്രിക് ഒ.പി,​ ഐ.പി, ഗൈനക്കോളജി ഒ.പി, ഐ.പി, ലേബർ റൂം, ഓപ്പറേഷൻ തിയേറ്റർ, മാമോഗ്രാം ഉപകരണങ്ങൾ, എക്സ് റേ മെഷീൻ, സ്‌കാനിംഗ് മെഷീൻ ആംബുലൻസ്, വാഹനം, ചുറ്റുമതിൽ തുടങ്ങിയവ നടപ്പാക്കുന്നതിനാണ് ഫണ്ട്.