വിലക്കയറ്റത്തിൽ ബി.പി.എൽകാർക്ക് കൈത്താങ്ങ്: സബ്‌സിഡിയിൽ വെളിച്ചെണ്ണ നൽകാൻ കേരഫെഡ്
കണ്ണൂർ: വെളിച്ചെണ്ണ വില കുതിച്ചുയരുന്ന സാഹചര്യത്തിൽ ബി.പി.എൽ കാർഡ് ഉടമകൾക്ക് സബ്സിഡി സഹായം പരിഗണിച്ച് കേരഫെഡ്. ഓണക്കാലത്ത് വെളിച്ചെണ്ണ വില കൂടുതൽ ഉയരുമെന്നതിനാലാണ് സബ്സിഡി നിരക്കിൽ വെളിച്ചെണ്ണ വിതരണം ചെയ്യാനുള്ള ആലോചന. ഇതു സംബന്ധിച്ച പ്രൊപ്പോസൽ സർക്കാരിന്റെ അനുമതിക്കായി സമർപ്പിക്കുമെന്ന് കേരഫെഡ് ചെയർമാൻ വി. ചാമുണ്ണി, എം.ഡി. സാജു സുരേന്ദ്രൻ, വൈസ് ചെയർമാൻ കെ. ശ്രീധരൻ എന്നിവർ വാർത്താ സമ്മേളനത്തിൽ അറിയിച്ചു. ഇന്ത്യൻ വിപണിയിൽ കൊപ്രയുടെ വിലയിൽ 2025 രണ്ടാം പാദത്തിൽ മുൻവർഷവുമായി താരതമ്യം ചെയ്യുമ്പോൾ 75ശതമാനം വർദ്ധിച്ചു. കേരളത്തിൽ മേയ് 1ന് ക്വിന്റലിന് 17,800 രൂപയായിരുന്ന കൊപ്രയുടെ വില ജൂൺ 22ന് 23,900 രൂപയായി കുതിച്ചുയർന്നു. 52 ദിവസത്തിനുള്ളിൽ 6,100 രൂപയാണ് വർദ്ധിച്ചത്. കേരാഫെഡിന്റെ കണക്കുകൾ പ്രകാരം 2024 ഒക്‌ടേബറിൽ കിലോഗ്രാമിന് 125 രൂപയായിരുന്ന കൊപ്രയുടെ സംഭരണ വില 2025 ജൂണിൽ 84ശതമാനം വർദ്ധിച്ച് 230 രൂപയായി ഉയർന്നു. വെളിച്ചെണ്ണയുടെ വില ഒരു ലിറ്ററിന് 245 രൂപയിൽ നിന്ന് 419 രൂപയായി ഉയർന്നു.
വിലയിൽ കുറവ് 2026 പകുതിയോടെ
ആഗോളതലത്തിൽ വെളിച്ചെണ്ണ വിലയിൽ ഏകദേശം 41ശതമാനവും രാജ്യത്ത് 60ശതമാനവും വർദ്ധനവും ഉണ്ടായിട്ടുണ്ട്. ലോകബാങ്കിന്റെ റിപ്പോർട്ട് പ്രകാരം 2026 പകുതിയാകുമ്പോൾ നിലവിലെ വിലക്കയറ്റത്തിൽ 2 ശതമാനത്തിന്റെ കുറവുണ്ടാകുമെന്നാണ് കണക്കാക്കുന്നത്.
വിലക്കയറ്റത്തിന് പ്രധാന കാരണങ്ങൾ
കാലാവസ്ഥാ വ്യതിയാനമൂലമുള്ള പ്രശ്നങ്ങൾ ആഗോള ആവശ്യകതയിലെ വർദ്ധന രോഗകീടബാധ
പുത്തൻ സംരംഭങ്ങൾ
ചെറുപുഴയിൽ പുതിയ നാളികേര സംഭരണ കേന്ദ്രം ആരംഭിച്ചു
മലപ്പുറം, കോഴിക്കോട്, പാലക്കാട് ജില്ലകളിൽ ഇസാഫുമായി സഹകരിച്ച് സംഭരണ കേന്ദ്രങ്ങൾ
വിപണിവിലയേക്കാൾ കൂടുതൽ വിലയ്ക്ക് പച്ചത്തേങ്ങ സംഭരണം
വ്യാജനെ കരുതിയിരിക്കണം
ഓണവിപണി ലക്ഷ്യമാക്കി 20 മുതൽ കൂടുതൽ ഷിഫ്റ്റുകൾ അനുവദിച്ച് ഉത്പാദനം വർദ്ധിപ്പിക്കും. ഉയർന്ന വിലയിൽ വെളിച്ചെണ്ണ വിറ്റഴിക്കാനുള്ള ആവേശത്തിൽ ഓണത്തിന് വ്യാജ വെളിച്ചെണ്ണ വിപണിയിൽ വ്യാപകമായി ഇറങ്ങാൻ സാദ്ധ്യതയുണ്ടെന്നും കേരാഫെഡ് മുന്നറിയിപ്പ് നൽകി.