കഞ്ചാവുമായി അന്യസംസ്ഥാന തൊഴിലാളികൾ പിടിയിൽ

പെരുമ്പാവൂർ: അഞ്ച് കിലോഗ്രാം കഞ്ചാവുമായി രണ്ട് അന്യസംസ്ഥാന തൊഴിലാളികളെ പെരുമ്പാവൂർ എ.എസ്.പി.യുടെ പ്രത്യേക അന്വേഷണ സംഘവും തടിയിട്ടപറമ്പ് പൊലീസും ചേർന്ന് പിടികൂടി. വെസ്റ്റ് ബംഗാൾ മൂർഷിദാബാദ് സ്വദേശികളായ റബീൻ മണ്ഡൽ (24), ആശിസ് സർക്കാർ (32) എന്നിവരാണ് അറസ്റ്റിലായത്. ജില്ലാ പൊലീസ് മേധാവി എം. ഹേമലതയ്ക്ക് ലഭിച്ച രഹസ്യ വിവരത്തെ തുടർന്നായിരുന്നു പരിശോധന.

ആലുവ എൻ.എ.ഡി ഭാഗത്ത് താമസിക്കുന്ന ആശിസ് സർക്കാരിനെ സ്‌കൂട്ടറിൽ കഞ്ചാവുമായി എത്തിച്ച് കൈമാറുന്നതിനിടെയാണ് കസ്റ്റഡിയിലെടുത്തത്. റോബിൻ ഭായ് എന്ന് അറിയപ്പെടുന്ന റബീൻ മണ്ഡലിനെ മാർച്ചിൽ ഒമ്പതര കിലോ കഞ്ചാവുമായി പെരുമ്പാവൂർ ബംഗാൾ കോളനിയിൽ നിന്ന് അറസ്റ്റ് ചെയ്തിരുന്നു. തുടർന്ന് ജയിലിലായിരുന്ന ഇയാൾ ഒന്നര മാസം മുമ്പാണ് മോചിതനായത്. വീണ്ടും വില്പന നടത്തുന്നുവെന്നത് കണ്ടെത്തിയതിനാൽ നിരീക്ഷണത്തിലായിരുന്നു. മലയാളികളായ യുവാക്കളും അന്യസംസ്ഥാനക്കാരുമായിരുന്നു ഉപഭോക്താക്കൾ. രാത്രികാലങ്ങളിൽ ചെമ്പറക്കി, പോഞ്ഞാശ്ശേരി ഭാഗങ്ങളിലായിരുന്നു പ്രധാനമായും കച്ചവടം.

അന്വേഷണ സംഘത്തിൽ പെരുമ്പാവൂർ എ.എസ്.പി ശക്തി സിംഗ് ആര്യ, ഇൻസ്‌പെക്ടർ പി.ജെ. കുര്യാക്കോസ്, എസ്.ഐ അജിമോൻ, എ.എസ്.ഐ പി.എ. അബ്ദുൽ മനാഫ്, സീനിയർ സി.പി.ഒ.മാരായ എസ്.സി. മനോജ്, വർഗീസ് ടി. വേണാട്ട്, ടി.എ. അഫ്‌സൽ, ബെന്നി ഐസക്, മുഹമ്മദ് നൗഫൽ, പി.എ. ഫസൽ, അജ്മൽ എന്നിവരുണ്ടായിരുന്നു. രണ്ടാഴ്ചക്കുള്ളിൽ 25 കിലോഗ്രാം കഞ്ചാവാണ് പെരുമ്പാവൂർ മേഖലയിൽ നിന്ന് പൊലീസ് പിടികൂടിയത്.