ജോലി സമ്മർദ്ദത്താൽ മരിച്ച അന്നയുടെ ഓർമ്മകൾക്ക് ഒരുവയസ്, മുറിവുണങ്ങാതെ മാതാപിതാക്കൾ

കൊച്ചി: തൃക്കാക്കര കങ്ങരപ്പടി പേരയിൽ വീട്ടിൽ സിബി ജോസഫും ഭാര്യ അനിത അഗസ്റ്റിനും ശാന്തമായി ഉറങ്ങിയിട്ട് ഒരുവർഷമാകുന്നു. കഴിഞ്ഞ ജൂലായ് 20നാണ് ഇവരുടെ പൊന്നോമന മകൾ അന്ന സെബാസ്റ്റ്യൻ (26) ജോലിസമ്മർദ്ദത്താൽ കുഴഞ്ഞുവീണു മരിച്ചത്. ഡി​സ്റ്റിംഗ്ഷനോടെ സി.എ പരീക്ഷ പാസായി ബഹുരാഷ്ട്ര കമ്പനിയിൽ ജോലിക്ക് കയറിയതിന്റെ നാലാം മാസമായിരുന്നു അന്നയുടെ അപ്രതീക്ഷിത വേർപാട്. ഉണ്ണാനും ഉറങ്ങാനുമാകാത്ത ജോലി സമ്മർദ്ദത്തിനിരയായ അന്നയുടെ മരണം രാജ്യം ചർച്ച ചെയ്തതാണെങ്കിലും പ്രഖ്യാപനങ്ങളും നടപടികളും എങ്ങുമെത്തിയില്ല.

ഇന്നാണ് അന്നയുടെ ഓർമ്മദി​നച്ചടങ്ങ്. വൈകി​ട്ട് നാലി​ന് തേവയ്‌ക്കൽ സെന്റ് മാർട്ടി​ൻ ഡി​ പോറസ് പള്ളി​യി​ൽ കുർബാനയും ആറി​ന് തൃക്കാക്കര ഭാരതമാതാ കോളേജി​ൽ അനുസ്മരണവുമുണ്ട്.

പൂനെയിലെ ഏണസ്റ്റ് ആൻഡ് യംഗി​ലെ (ഇ ആൻഡ് വൈ) ജോലി അന്നയുടെ സ്വപ്നമായിരുന്നു. മകളുടെ മരണത്തെത്തുടർന്ന് അമ്മ, കമ്പനി​യുടെ ഇന്ത്യാ ചെയർമാൻ രാജീവ് മേവാനി​ക്ക് അയച്ച കത്ത് ദേശീയ മാദ്ധ്യമങ്ങളിൽ ചർച്ചയായതോടെയാണ് സംഭവം വി​വാദമായത്. കേന്ദ്രസർക്കാരും കേന്ദ്ര മനുഷ്യാവകാശ കമ്മി​ഷനും സംസ്ഥാന സർക്കാരും ഇ ആൻഡ് വൈ കമ്പനി​യും വി​വി​ധ നടപടി​കൾ പ്രഖ്യാപി​ച്ചെങ്കി​ലും ഒന്നും ഫലമുണ്ടാക്കി​യി​ല്ല.

'ഫോർ അന്ന, ഫോർ ഓൾ" എന്ന ക്യാമ്പെയിൻ പ്രൊഫഷണൽ കോൺ​ഗ്രസ് നടത്തുന്നുണ്ട്. തി​രുവനന്തപുരത്തെ ഉദ്ഘാടനച്ചടങ്ങി​ൽ മാതാപി​താക്കൾ പങ്കെടുത്തി​രുന്നു. ഇന്ന് ഡൽഹിയിൽ ഡി.വൈ.എഫ്.ഐ യുവജന കൺവെൻഷനിൽ വിഷയം ചർച്ചയാക്കുമെന്ന് എ.എ.റഹീം എം.പി വീട്ടുകാരെ അറി​യിച്ചു.

ഒന്നും മാറിയില്ല

• അന്നയെ നി​രന്തരം ബുദ്ധി​മുട്ടി​ച്ച രണ്ട് മേലുദ്യോഗസ്ഥരെയും മാറ്റി​നി​റുത്തി​യെങ്കി​ലും ​ അവർ അതേ ഓഫീസി​ൽ ജോലി​യി​ലുണ്ട്.

• തൊഴി​ൽ ചൂഷണത്തെക്കുറി​ച്ച് കേന്ദ്ര തൊഴി​ൽ മന്ത്രി​ മൻസൂഖ് മാണ്ഡവ്യ അന്വേഷണം പ്രഖ്യാപി​ച്ചെങ്കി​ലും കുടുംബത്തി​ന് ഒരറി​വുമി​ല്ല.

• ദേശീയ മനുഷ്യാവകാശ കമ്മി​ഷൻ കേന്ദ്രതൊഴി​ൽ മന്ത്രാലയത്തി​ന് നോട്ടീസ് അയച്ചിരുന്നു. കുടുംബത്തി​ന് അറി​യി​പ്പൊന്നും ലഭി​ച്ചി​ട്ടി​ല്ല.

• കഴിഞ്ഞമാസം ബംഗളൂരുവിലെ സ്വകാര്യ കമ്പനിയുടെ എ.ഐ ഡിവിഷൻ എൻജി​നി​യർ നിഖിൽ സോമവൻഷിയും ജോലി​സമ്മർദ്ദത്താൽ ജീവനൊടുക്കി​യി​രുന്നു.

 ജീവി​തം അർത്ഥശൂന്യമായത് പോലെയാണ്. അന്നയുടെ ദുരനുഭവം രാജ്യത്തി​ന് പാഠമാകുമെന്ന് കരുതി​. ആരും ഇങ്ങനെ ഇരകളാകാതി​രി​ക്കാൻ ഇനിയെങ്കിലും നടപടി ഉണ്ടാകണം.

- സി​ബി​ ജോസഫ്,

അന്നയുടെ പി​താവ്