ചിറ്റൂർ പുഴയിൽ കുളിക്കാനിറങ്ങിയ യുവാക്കൾ മുങ്ങിമരിച്ചു

പാലക്കാട്: ചി​റ്റൂർ പുഴയിൽ ഒഴുക്കിൽപ്പെട്ട രണ്ട് യുവാക്കളും മുങ്ങിമരിച്ചു. കോയമ്പത്തൂരിൽ നിന്നെത്തിയ വിദ്യാർത്ഥി സംഘത്തിലെ രാമേശ്വരം സ്വദേശികളായ ശ്രീ ഗൗതം, അരുൺ എന്നിവരാണ് മരിച്ചത്. ഇന്ന് ഉച്ചയ്ക്ക് രണ്ട് മണിയോടെയായിരുന്നു അപകടം. യുവാക്കൾ ചുഴിയിൽപ്പെട്ട് ഓവുചാലിലേക്ക് വീഴുകയായിരുന്നു.

ആദ്യം ശ്രീ ഗൗതമിനെ രക്ഷപ്പെടുത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പിന്നാലെ നടത്തിയ തെരച്ചിലിലാണ് അരുണിനെ കണ്ടെത്തിയത്. ഇവിടെ ഒഴുക്ക് ശക്തമാണെന്നാണ് നാട്ടുകാർ പറയുന്നത്. അന്യസംസ്ഥാനങ്ങളിൽ നിന്ന് നിരവധിയാളുകളാണ് അവധി ദിവസം ആഘോഷിക്കാനായി ഇവിടേക്ക് വരുന്നത്. ഇതിനുമുൻപും ഇവിടെ അപകടങ്ങൾ സംഭവിച്ചിട്ടുണ്ട്.