കെ.എസ്.എഫ്.ഇ നേട്ടം അഭിമാനം: മുഖ്യമന്ത്രി

തിരുവനന്തപുരം: ഒരു ലക്ഷം കോടി വിറ്റുവരവ് കൈവരിച്ച കെ.എസ്.എഫ്.ഇയുടെ നേട്ടം കേരളത്തിനും സംസ്ഥാനത്തിന്റെ ധനകാര്യ മേഖലയ്ക്കും അഭിമാനകരമാണെന്ന് മുഖ്യമന്ത്രി പിണറായി വിജയൻ. കെ.എസ്.എഫ്.ഇ ഒരു ലക്ഷം കോടി വിറ്റുവരവ് നേട്ടം കൈവരിച്ചതിന്റെ പ്രഖ്യാപനവും ആഘോഷ പരിപാടികളുടെ ഉദ്ഘാടനവും തിരുവനന്തപുരം സെൻട്രൽ സ്റ്റേഡിയത്തിൽ നിർവഹിക്കുകയായിരുന്നു മുഖ്യമന്ത്രി.

പ്രതിസന്ധികളിൽ ഉലയാത്ത വലിയൊരു സാമ്പത്തിക മാതൃകയാണ് കെ.എസ്.എഫ്.ഇ ലോകത്തിന് മുൻപിൽ ഉയർത്തിക്കാട്ടുന്നത്. മലയാളികളുടെ നിത്യജീവിതവുമായി ബന്ധപ്പെട്ട് പ്രവർത്തിക്കുന്ന കെ.എസ്.എഫ്.ഇ സാധാരണക്കാർക്ക് സാമ്പത്തിക ആവശ്യങ്ങൾക്ക് ആശ്രയിക്കാവുന്ന സ്ഥാപനങ്ങളിൽ മുൻപന്തിയിലാണ്.

സാമ്പത്തിക തകർച്ച, കൊവിഡ് തുടങ്ങിയ പ്രതിസന്ധികളിൽ ലോകത്തിലെയും രാജ്യത്തെയും പല ധനകാര്യ സ്ഥാപനങ്ങളും തകർന്നടിഞ്ഞപ്പോൾ കെ.എസ്.എഫ്.ഇ മികച്ച മാതൃകയായി. സമൂഹത്തിലെ എല്ലാവിഭാഗം ജനങ്ങൾക്കിടയിലും കൂടുതൽ വേരുകളുള്ള ധനകാര്യ സ്ഥാപനമായി മുന്നേറാൻ കെ.എസ്.എഫ്.ഇയ്ക്ക് കഴിയണം.

രാജ്യത്തെ പൊതുമേഖലാസ്ഥാപനങ്ങൾ നയവൈകല്യങ്ങളാൽ തകരുന്ന സാഹചര്യത്തിൽ കെ.എസ്.എഫ്.ഇ ഒരു ബദലായി ഉയർന്നു വരികയാണ്. നവകേരളം സൃഷ്ടിക്കുന്നതിൽ സുപ്രധാന പങ്ക് സ്ഥാപനത്തിനുണ്ട്. 2016 മുതൽ കെ.എസ്.എഫ്.ഇയെ കൂടുതൽ ജനകീയമാക്കാൻ വലിയ ഇടപെടലുകൾ നടന്നു. പ്രവാസികൾക്ക് ചിട്ടിയിൽ ചേരാൻ സൗകര്യമൊരുക്കി.

മൊബൈൽ ആപ്ലിക്കേഷൻ യാഥാർത്ഥ്യമാകുന്നതോടെ കെ.എസ്.എഫ്.ഇയുടെ സേവനങ്ങൾ ഉപഭോക്താക്കൾക്ക് കൂടുതൽ എളുപ്പത്തിൽ ലഭ്യമാകും. 121 രാജ്യങ്ങളിൽ നിന്നും ഇന്ത്യയിലെ ഇതരസംസ്ഥാനങ്ങളിൽ നിന്നുമുള്ളവർ കെ.എസ്.എഫ്.ഇ ചിട്ടിയിൽ അംഗങ്ങളായി ചേർന്നിട്ടുണ്ട്. ഇത് കേരളത്തിന്റെ അടിസ്ഥാനസൗകര്യ വികസനത്തിനുള്ള സംഭാവന എന്ന നിലയ്ക്ക് കൂടിയാണെന്ന് മുഖ്യമന്ത്രി പറഞ്ഞു. 'കെ.എസ്.എഫ്.ഇ ഈ നാടിന്റെ ധൈര്യം' എന്ന മുദ്രാവാചകം ബ്രാൻഡ് അംബാസഡറായ സുരാജ് വെഞ്ഞാറമൂടിന് നൽകി മുഖ്യമന്ത്രി പ്രകാശനം ചെയ്തു.

ഒരു ട്രില്യൺ ബിസിനസ് എന്ന മികച്ച നേട്ടത്തിലൂടെ മറ്റ് സംസ്ഥാനങ്ങൾ താല്പര്യപൂർവം വീക്ഷിക്കുന്ന പ്രസ്ഥാനമായി കെ.എസ്.എഫ്.ഇ മാറിയെന്ന് അദ്ധ്യക്ഷത വഹിച്ച ധനമന്ത്രി കെ.എൻ.ബാലഗോപാൽ പറഞ്ഞു. ഒരു കോടി ഉപഭോക്താക്കൾ എന്ന ലക്ഷ്യത്തിലേക്കുള്ള പ്രഖ്യാപനവും, ചിട്ടി ഫ്രട്ടേണിറ്റി ഫണ്ടായി റീബ്രാൻഡ് ചെയ്യുന്ന പ്രഖ്യാപനവും മന്ത്രി നിർവഹിച്ചു. കെ.എസ്.എഫ്.ഇ ഓണം സമൃദ്ധി ഗിഫ്റ്റ് കാർഡിന്റെ ഉദ്ഘാടനം മന്ത്രി ജി.ആർ.അനിൽ ഉപഭോക്താവ് എസ്.ശ്യാമളാമ്മയ്ക്ക് നൽകി നിർവഹിച്ചു. ആന്റണിരാജു എം.എൽ.എ, കെ.എസ്.എഫ്.ഇ ചെയർമാൻ കെ.വരദരാജൻ, മാനേജിംഗ് ഡയറക്ടർ ഡോ.എസ്.കെ.സനിൽ തുടങ്ങിയവർ പങ്കെടുത്തു.