സ്‌കൂൾ കുട്ടികളുമായി വന്ന വാൻ കുഴിയിലേയ്ക്ക് വീണ് അപകടം, 31 കുട്ടികൾക്കും അദ്ധ്യാപികയ്ക്കും പരിക്ക്
തിരുവനന്തപുരം: സ്‌കൂൾ കുട്ടികളുമായി വന്ന വാൻ കുഴിയിൽ വീണ് അപകടം. വാനിലുണ്ടായിരുന്ന 31 കുട്ടികൾക്കും ഒരു അദ്ധ്യാപികയ്ക്കും പരിക്കേറ്റു. ഇന്ന് രാവിലെ 9.30ഓടെ തിരുവനന്തപുരം വട്ടിയൂർക്കാവ് മലമുകളിലാണ് അപകടമുണ്ടായത്. സെന്റ് സാന്താസ് സ്‌കൂൾ വിദ്യാർത്ഥികളുമായിപ്പോയ സ്വകാര്യ വാൻ ആണ് അപകടത്തിൽപ്പെട്ടത്. കുട്ടികളുടെ പരിക്ക് ഗുരുതരമല്ലെന്നാണ് ആശുപത്രി അധികൃതർ അറിയിച്ചത്.
ശാസ്തമംഗലത്തെ സ്വകാര്യ ആശുപത്രിയിലാണ് കുട്ടികളെ പ്രവേശിപ്പിച്ചിരിക്കുന്നത്. മന്ത്രി വി ശിവൻകുട്ടി ആശുപത്രിയിലെത്തി കുട്ടികളെ സന്ദർശിച്ചു. നിരീക്ഷണത്തിനും പരിശോധനകൾക്കും ശേഷം പരിക്കേറ്റവരെ ഡിസ്‌ചാർജ് ചെയ്യും. റോഡിന്റെ മോശം അവസ്ഥയും കൈവരി കെട്ടാത്തുമാണ് അപകടത്തിന് കാരണമായതെന്ന് ഒരു അദ്ധ്യാപിക പറഞ്ഞു. സ്വകാര്യ വാഹനങ്ങൾ സ്‌കൂളിൽ പ്രവേശിക്കാതെ പുറത്ത് റോഡിൽ കുട്ടികളെ ഇറക്കി തിരിച്ചുപോവുകയാണ് ചെയ്യുന്നതെന്ന് നാട്ടുകാർ പറയുന്നു. വാൻ പിന്നിലേയ്ക്ക് തിരിക്കുന്നതിടെ സമീപത്തെ കുഴിയിലേയ്ക്ക് വീണതാണെന്നും നാട്ടുകാർ പറഞ്ഞു.