'തണല്‍' ബ്രെയിന്‍ ആന്റ് സ്‌പൈന്‍ മെഡിസിറ്റി അത്യാധുനിക കെട്ടിടം ഉദ്ഘാടനം ചെയ്തു
കണ്ണൂർ: കണ്ണൂരിലെ ന്യൂറോ റീഹാബിലിറ്റേഷന്‍ സെന്ററായ കാഞ്ഞിരോട് 'തണല്‍' ബ്രെയിന്‍ ആന്റ് സ്‌പൈന്‍ മെഡിസിറ്റി മലബാര്‍ ഗ്രൂപ്പിന്റെ സഹായത്തോടെ നിര്‍മ്മിച്ച അത്യാധുനിക കെട്ടിടത്തിന്റെ ഉദ്ഘാടനം നിയമസഭാ സ്പീക്കര്‍ എ.എന്‍ ഷംസീര്‍ നിര്‍വഹിച്ചു. അപകടത്തിലും മറ്റും പരിക്കേറ്റ് കിടപ്പിലായിപ്പോയവര്‍ക്കും മറ്റ് രോഗികള്‍ക്കും ബ്രെയിന്‍ ആന്റ് സ്‌പൈന്‍ മെഡിസിറ്റി നല്‍കുന്ന ചികിത്സാ സേവനം മഹത്തരവും മനുഷ്യത്വപരവുമാണെന്ന് അദ്ദേഹം പറഞ്ഞു. അത്യാധുനിക സൗകര്യങ്ങളോടെ 70 കിടക്കകളുള്ള പുതിയ കെട്ടിടമാണ് സ്ഥാപിച്ചിട്ടുള്ളത്. ഒരു കോടി രൂപയാണ് മലബാര്‍ ഗ്രൂപ്പ് പുതിയ കെട്ടിടത്തിന് സംഭാവനയായി നല്‍കിയത്. 2022 ല്‍ 'തണല്‍' സന്നദ്ധ സംഘടനയുടെ ആഭിമുഖ്യത്തില്‍ കാഞ്ഞിരോട് ആരംഭിച്ച ബ്രെയിന്‍ ആന്റ് സ്‌പൈന്‍ മെഡിസിറ്റി അപകടത്തിലും മറ്റും നട്ടെല്ലിന് ക്ഷതമേറ്റും തലച്ചോറിന് പരിക്കേറ്റും പക്ഷാഘാതം മൂലം കിടപ്പിലായതുമായ രോഗികളെ അത്യാധുനിക ചികിത്സയിലൂടെ സുഖപ്പെടുത്തുകയാണ് ചെയ്യുന്നത്. പുതിയ കെട്ടിടത്തിലെ ഓഡിറ്റോറിയം കെ.കെ ശൈലജ എം.എല്‍.എ ഉദ്ഘാടനം ചെയ്തു. ഐ.പി ബ്ലോക്ക് ഉദ്ഘാടനം മലബാര്‍ ഗ്രൂപ്പ് ചെയര്‍മാന്‍ എം.പി അഹമ്മദും സല്‍സാര്‍ ന്യൂറോ സെന്റര്‍ ഉദ്ഘാടനം സല്‍സാര്‍ ചാരിറ്റബിള്‍ ട്രസ്റ്റ് ചെയര്‍മാന്‍ എം.സലാഹുദ്ദീനും നിര്‍വഹിച്ചു. 'തണല്‍' ചെയര്‍മാന്‍ ഡോ.വി. ഇദ്‌രീസ് ചടങ്ങില്‍ അദ്ധ്യക്ഷത വഹിച്ചു. പി.കെ ഷൈമ, എ. അനീഷ, പി.പി റെജി, ടി.മഞ്ജുള, എം.രതീഷ്, വി.വി മുനീര്‍, കെ.കെ ചന്ദ്രന്‍ എന്നിവര്‍ പ്രസംഗിച്ചു. എ.പി.എം ആലിപ്പി ഉപഹാര സമര്‍പ്പണം നടത്തി.