ലൈസൻസ് ഇളവ്: സ്വാഗതം ചെയ്ത് കെ.എച്ച്.ആർ.എ

കൊച്ചി:സംസ്ഥാനത്ത് വ്യാപാര വ്യവസായ മേഖലയിലെ ലൈസൻസിംഗ് വ്യവസ്ഥകൾ ലഘൂകരിച്ച സർക്കാർ നടപടിയെ സ്വാഗതം ചെയ്ത് കേരള ഹോട്ടൽ ആൻഡ് റസ്റ്റോറന്റ് അസോസിയേഷൻ.ട്രേഡ് ലൈസൻസ് കരസ്ഥമാക്കുന്നതിന് തദ്ദേശ സ്വയംഭരണ സ്ഥാപനങ്ങളിലെ കടുത്ത വ്യവസ്ഥകൾ സംസ്ഥാനത്തെ ചെറുകിട ഹോട്ടൽമേഖലയ്ക്ക് തിരിച്ചടിയായിരുന്നു.

മലിനീകരണ നിയന്ത്രണ ബോർഡിന്റെ വൈറ്റ്, ഗ്രീൻ വിഭാഗത്തിൽപ്പെട്ട കാറ്റഗറി രണ്ട് സംരംഭങ്ങൾക്ക് ലൈസൻസ് അനുവദിക്കുന്നതിനുള്ള ഇളവുകൾ ചെറുകിട ഇടത്തരം ഹോട്ടലുകൾക്കും ഗുണകരമാകും.നാളുകളായുള്ള ആവശ്യമാണ് സർക്കാർ അംഗീകരിച്ചതെന്നും ഇതേത്തുടർന്നുള്ള സമരങ്ങൾ നിർത്തിവെച്ചതായും കേരള ഹോട്ടൽ ആൻഡ് റസ്റ്റോറന്റ് അസോസിയേഷൻ സംസ്ഥാന പ്രസിഡന്റ് കെ.പി.ബാലകൃഷ്ണ പൊതുവാളും ജനറൽ സെക്രട്ടറി ജി. ജയപാലും അറിയിച്ചു.