കേരളത്തിലെ യാത്രക്കാരുടെ ഏറെനാളത്തെ ആവശ്യം ഒടുവിൽ പരിഗണിച്ച് റെയിൽവെ, മാറ്റം സെപ്‌തംബർ ഒന്നുമുതൽ

തിരുവനന്തപുരം: കേരളത്തിലെ യാത്രക്കാരുടെ ഏറെനാളായുള്ള ആവശ്യത്തിൽ തീരുമാനമെടുത്ത് റെയിൽവെ. സെപ്തംബർ ഒന്ന് മുതൽ കൊല്ലം-താംബരം എക്‌സ്‌പ്രസ്‌ ട്രെയിനിന്റെ സമയക്രമം മാറുന്നു.

യാത്രക്കാരുടെ ദീർഘകാല ആവശ്യമാണ് ഇതോടെ നടപ്പിലാകുന്നത്. ഉച്ചയ്ക്ക് 12 ന് കൊല്ലത്ത് നിന്ന് പുറപ്പെട്ട് പുലർച്ചെ 3.20 ന് തമിഴ്നാട്ടിലെ താംബരത്ത് എത്തിയിരുന്ന ട്രെയിൻ ഇനി മുതൽ വൈകിട്ട് നാലിന് പുറപ്പെട്ട് പുലർച്ചെ 7:30നാകും താംബരത്ത് എത്തുക.

എം.പി മാരായ കൊടിക്കുന്നിൽ സുരേഷ്, എൻ.കെ. പ്രേമചന്ദ്രൻ എന്നിവർ സമയമാ​റ്റം ആവശ്യപ്പെട്ട് കേന്ദ്ര റെയിൽവേ മന്ത്റി അശ്വനി വൈഷ്ണവിന് നേരത്തെ കത്ത് നൽകിയിരുന്നു. കേരളത്തിൽ നിന്നുള്ള കൂടുതൽ യാത്രക്കാർക്ക് പ്രയോജനം ചെയ്യുന്നതാണ് പുതിയ സമയക്രമം. താംബരത്തേക്കു മാ​റ്റിയതോടെ കോച്ചുകൾ കൂട്ടാനും കഴിയും. എഗ്മൂറിലെ പ്ലാ​റ്റ്ഫോം പ്രശ്നങ്ങൾ കാരണം മുൻപ് കോച്ചുകൾ കൂട്ടാനാവാത്ത സ്ഥിതിയുണ്ടായിരുന്നു. ഈ പ്രശ്‌നങ്ങൾക്കാണ് വരുന്ന മാസത്തോടെ പരിഹാരമാകുന്നത്.

പുതിയ സമയക്രമം– കൊല്ലം–4.00, കുണ്ടറ–4.06, കൊട്ടാരക്കര–4.15, ആവണീശ്വരം–4.28, പുനലൂർ–4.55, തെൻമല–5.43, ആര്യങ്കാവ്–6.13, ചെങ്കോട്ട–7.10, മധുര–10.25, ഡിണ്ടിഗൽ–11.25, തിരുച്ചിറപ്പള്ളി–1.45, വില്ലുപുരം–4.40, താംബരം–7.30.