എംആർ അജിത് കുമാറിന് ആശ്വാസം; അനധികൃത സ്വത്ത് സമ്പാദന കേസിന്റെ തുടർനടപടി സ്റ്റേ ചെയ്തു

കൊച്ചി: എഡിജിപി എംആർ അജിത് കുമാറിനെതിരായ അനധികൃത സ്വത്ത് സമ്പാദന കേസിൽ വിജിലൻസ് കോടതിയുടെ തുടർനടപടികൾ ഹെെക്കോടതി സ്റ്റേ ചെയ്തു. ജസ്റ്റിസ് എ ബദറുദീന്റെ ബെഞ്ചിന്റേതാണ് ഉത്തരവ്. ഓണാവധിക്ക് ശേഷം കേസിൽ വിശദമായ വാദം കേൾക്കാമെന്ന് പറഞ്ഞുകൊണ്ടാണ് ഇടക്കാലത്തേക്ക് നടപടി സ്റ്റേ ചെയ്തിരിക്കുന്നത്.

കഴിഞ്ഞ ദിവസം വിജിലൻസ് കോടതിയുടെ വിധിയിൽ ചില സംശയങ്ങൾ ഹെെക്കോടതി ഉന്നയിച്ചിരുന്നു. ഈ സംശയങ്ങൾ നിലനിൽക്കുന്നതാണെന്ന് ചൂണ്ടിക്കാട്ടിയാണ് വിശദവാദത്തിനായി മാറ്റിയത്. തനിക്ക് ക്ലീൻ ചിറ്റ് നൽകിയ വിജിലൻസ് റിപ്പോർട്ട് തള്ളിയ പ്രത്യേക കോടതി വിധിക്കെതിരെ എംആർ അജിത്കുമാറാണ് ഹെെക്കോടതിയെ സമീപിച്ചത്.