'ദുരന്തവുമായി ബന്ധപ്പെട്ട് മുന്നറിയിപ്പുണ്ട്, താമരശ്ശേരി ചുരത്തിൽ ആധുനിക ഉപകരണങ്ങൾ എത്തിച്ച് പരിശോധന നടത്തണം'

വയനാട്: താമരശ്ശേരി ചുരത്തിലെ ഗതാഗത പ്രശ്നങ്ങൾ എത്രയും വേഗം പരിഹരിക്കുമെന്ന് റവന്യൂ മന്ത്രി കെ രാജൻ. ചുരത്തിലൂടെ ഭാരവാഹനങ്ങൾ കടത്തിവിടാൻ സാധിക്കാത്ത തരത്തിലുളള സാങ്കേതിക പ്രശ്നങ്ങളുണ്ടെന്നും അദ്ദേഹം പറഞ്ഞു. ആധുനിക ഉപകരണങ്ങൾ എത്തിച്ച് പരിശോധന നടത്തിയാൽ മാത്രമേ കൂടുതൽ സ്ഥിരീകരണങ്ങൾ നടത്താൻ സാധിക്കുളളൂവെന്ന് മന്ത്രി മാദ്ധ്യമങ്ങളോട് പങ്കുവച്ചു.

'താമരശ്ശേരി ചുരത്തിലൂടെ ചെറുവാഹനങ്ങൾ കടത്തിവിട്ട് തുടങ്ങി. ഗതാഗതം ആരംഭിച്ചു. മഴ കുറഞ്ഞതിനാലാണ് ഗതാഗതം അനുവദിച്ചത്. ഭാരവാഹനം കു​റ്റ്യാടി, നാടുകാണി ചുരം വഴി പോകണം. ഇന്നലെ വൈകുന്നേരം വയനാട്, കോഴിക്കോട് ജില്ലാ കളക്ടർമാരുമായും ദുരന്തനിവാരണ അതോറി​റ്റിയുടെ ഉന്നത ഉദ്യോഗസ്ഥരുമായി കൂടിക്കാഴ്ച നടത്തിയിരുന്നു. പരിശോധന നടത്തി. താമരശ്ശേരി ചുരത്തിലെ ഇത്തരം പ്രശ്നങ്ങൾ ഓണക്കാലത്തെ ബാധിക്കുമെന്നത് യാഥാർത്ഥ്യമാണ്. പക്ഷെ ഈ പ്രശ്നം കണ്ട് വാഹനങ്ങൾ കടത്തിവിടാൻ കഴിയാത്ത ചില സാങ്കേതിക പ്രശ്നങ്ങളുണ്ട്.

ദുരന്തവുമായി ബന്ധപ്പെട്ട് മുന്നറിയിപ്പുണ്ട്. ഒമ്പതാം വളവിലെ ചുരത്തിലെ മണ്ണിടിച്ചിലിന്റെ പ്രഭവകേന്ദ്രം 80 അടി മുകളിലാണ്. ഇന്നലെ ഉച്ചയോടെ വലിയ ശബ്ദത്തോടെയാണ് മണ്ണിടിച്ചിലുണ്ടായത്. അവിടെ ഒരു വെളളച്ചാലുമുണ്ടായിട്ടുണ്ട്. അതിനാൽത്തന്നെ ഭാരവാഹനം അതുവഴി കടത്തിവിടാൻ സാധിക്കില്ലെന്നാണ് വിദഗ്ധ സമിതി മുന്നറിയിപ്പ് നൽകിയിരിക്കുന്നത്. ഇക്കാര്യങ്ങൾ പരിശോധിക്കണമെങ്കിൽ ഇലക്ട്രിക്കൽ റെസ്​റ്റി​റ്റിവി​റ്റിയും ജിപിആർ പോലുളള ഉപകരണങ്ങൾ ഉപയോഗിക്കണം. ഇന്നലെ മുതൽ തന്നെ ചെറിയ വാഹനങ്ങൾ കടത്തിവിടുന്നുണ്ട്. കു​റ്റ്യാടിയിലുണ്ടായ മണ്ണിടിച്ചിലിനെക്കുറിച്ചും പരിശോധന നടത്തിയിട്ടുണ്ട്. കു​റ്റ്യാടിയിലെ റോഡിലെ ചില പ്രശ്നങ്ങൾ മാ​റ്റുന്നതിന് നിർദ്ദേശം നൽകിയിട്ടുണ്ട്. സുരക്ഷ ഉറപ്പാക്കിയ ശേഷമേ താമരശ്ശേരി ചുരത്തിലെ ഗതാഗതം സാധാരണ നിലയിലാക്കുകയുളളൂ'- മന്ത്രി അറിയിച്ചു.

അതേസമയം, താമരശ്ശേരി ചുരത്തിലൂടെ ഒറ്റ വരിയായിട്ടാണ് ചെറുവാഹനങ്ങൾ കടത്തിവിടുന്നത്. ഇന്നലെ 80 അടി മുകളിൽ നിന്ന് കല്ലും മണ്ണും മരങ്ങളും ഒഴുകിയെത്തുകയായിരുന്നു. ചൊവ്വാഴ്ച മണ്ണിടിഞ്ഞ സ്ഥലത്താണ് വീണ്ടും അപകടമുണ്ടായത്. ചൊവ്വാഴ്ച രാത്രി ഇടിഞ്ഞ മണ്ണ് നീക്കി ബുധനാഴ്ച രാത്രി ഒമ്പത് മണിയോടെ ഗതാഗതം പുനഃസ്ഥാപിച്ചിരുന്നു. എന്നാൽ ഇന്നലെ രാവിലെ എട്ടു മണിയോടെ മഴ ശക്തിപ്പെട്ടു. കല്ലും പാറകളും റോഡിലേക്ക് വീഴാൻ തുടങ്ങിയതോടെ വാഹനങ്ങൾ തടഞ്ഞിട്ടു. ചുരത്തിൽ നീർച്ചാലുകൾ രൂപപ്പെട്ടതിനാൽ അപകടസാദ്ധ്യത നിലനിൽക്കുകയാണ്.