കണ്ണൂരിൽ വൻ സ്‌ഫോടനം; വീട് പൂർണമായും തകർന്നു, മൃതദേഹം ചിന്നിച്ചിതറിയ നിലയിൽ
കണ്ണൂർ: വീടിനുള്ളിൽ വൻ സ്‌ഫോടനം. കണ്ണൂർ കണ്ണപുരം കീഴറയിലാണ് സംഭവം. കീഴറ ഗോവിന്ദന്‍ എന്ന വ്യക്തിയുടെ ഉടമസ്ഥതയിലുള്ള വീട്ടിൽ വാടകക്കാരാണ് താമസിച്ചിരുന്നത്. സ്‌ഫോടനത്തില്‍ വീട് പൂര്‍ണമായും തകര്‍ന്നു. അപകടത്തിൽ ഒരാള്‍ മരിച്ചു.
ഇന്ന് പുലർച്ചെ രണ്ട് മണിയോടെയായിരുന്നു സ്‌ഫോടനം നടന്നത്. വീടിനുള്ളില്‍ ശരീരാവശിഷ്ടങ്ങള്‍ ചിന്നിച്ചിതറിയ നിലയിലായിരുന്നുവെന്നാണ് വിവരം. അപകടവിവരമറിഞ്ഞ് കണ്ണപുരം പൊലീസ് സ്ഥലത്ത് പരിശോധന നടത്തി. ഫയര്‍ഫോഴ്‌സ് സംഘവും സ്ഥലത്തെത്തി. ബോംബ് നിര്‍മ്മാണത്തിനിടെ ഉണ്ടായ അപകടമാണെന്നാണ് പ്രാഥമിക നിഗമനം. വീട്ടില്‍ നിന്നും പൊട്ടാത്ത നാടന്‍ ബോംബുകള്‍ കണ്ടെത്തി. അപകടം നടന്ന സ്ഥലത്ത് ബോംബ് സ്‌ക്വാഡും പരിശോധന നടത്തുന്നുണ്ട്.
പയ്യന്നൂരിൽ സ്‌പെയർ പാർട്‌സ് കട നടത്തുന്നവരാണ് വീട്ടിൽ താമസിച്ചിരുന്നതെന്നാണ് വിവരം. ഇവരെക്കുറിച്ച് പ്രദേശവാസികൾക്ക് കൂടുതൽ അറിവില്ല. വീടിനുള്ളിൽ രണ്ടുപേരാണ് താമസിച്ചിരുന്നത്. രാത്രി എത്തുന്ന ഇവർ പുലർച്ചെ മടങ്ങാറാണ് പതിവ്. അനൂപ് എന്നയാളാണ് വീട് വാടകയ്‌ക്കെടുത്തതെന്നാണ് ഒരു സമീപവാസി പറയുന്നത്. സ്‌ഫോടനത്തിന്റെ ആഘാതത്തിൽ സമീപത്തെ വീടുകളിലും നാശനഷ്‌ടങ്ങളുണ്ടായി. നിരവധി വീടുകളുടെ വാതിലുകൾ തകരുകയും ചുവരുകളിൽ വിള്ളൽ വീഴുകയും ചെയ്‌തിട്ടുണ്ട്.