ആധാർ സേവന കേന്ദ്രങ്ങൾ ആരംഭിക്കാൻ ബി.എൽ.എസ്

കൊച്ചി: ജില്ലാതലത്തിൽ ആധാർ സേവ കേന്ദ്രങ്ങൾ സ്ഥാപിച്ച് പ്രവർത്തിപ്പിക്കുന്നതിന് ബി.എൽ.എസ് ഇന്റർനാഷണലിന് യുണീക് ഐഡന്റിഫിക്കേഷൻ അതോറിറ്റി ഒഫ് ഇന്ത്യയിൽ (യു.ഐ.ഡി.എഐ) നിന്ന് 2,055.35 കോടി രൂപയുടെ കരാർ ലഭിച്ചു. ഇതോടെ ആധാറുമായി ബന്ധപ്പെട്ട സേവനങ്ങളും രാജ്യത്തെ പൗരന്മാർക്ക് ബി.എൽ.എസിന്റെ ഓഫീസുകളിൽ അതോറിറ്റിയുടെ മേൽനോട്ടത്തിൽ സുരക്ഷിതമായും എളുപ്പത്തിലും ലഭ്യമാകും. ഇതിനായി രാജ്യത്തെമ്പാടും ബി.എൽ.എസ് പുതിയ കേന്ദ്രങ്ങൾ സ്ഥാപിക്കും. ലോകമെങ്ങും വിവിധ സർക്കാരുകളോടൊപ്പം വിശ്വസ്ഥ പങ്കാളിയായി പ്രവർത്തിക്കുന്ന ബി.എൽ.എസിന്റെ കാര്യക്ഷമതയും മികവും പരിചയ സമ്പത്തുമാണ് ആധാര്‍ കേന്ദ്രങ്ങൾ സ്ഥാപിക്കുന്നതിനുള്ള വൻ കരാറിലേക്ക് നയിച്ചത്. 70ലധികം രാജ്യങ്ങളിൽ ബി.എൽ.എസ് സേവന കേന്ദ്രങ്ങൾ സജീവമാണ്.