സ്കൂട്ടർ നിയന്ത്രണം വിട്ടു; റോഡിൽ വീണ 24കാരന്റെ ദേഹത്ത് ബസ് കയറിയിറങ്ങി, ദാരുണാന്ത്യം

ഹരിപ്പാട്: റോഡിലേക്ക് കയറിക്കിടക്കുന്ന മണലിൽ കയറി നിയന്ത്രണം വിട്ട സ്കൂട്ടറിൽ നിന്ന് വീണ യുവാവ് ബസ് കയറി മരിച്ചു. ആറാട്ടുപുഴ കോണിപ്പറമ്പിൽ താജുദ്ദീൻ മുസ്‌ലിയാരുടെ മകൻ മിഥിലാജാണ് (24) മരിച്ചത്. തൃക്കുന്നപ്പുഴ - വലിയഴിക്കൽ റോഡിൽ കാർത്തിക ജംഗ്‌ഷന് സമീപം വെെകുന്നേരം ആറരയോടെയാണ് അപകടം നടന്നത്.

ആറാട്ടുപുഴ ഭാഗത്തേക്ക് സ്കൂട്ടറിൽ പോകുമ്പോൾ മണ്ണിൽ കയറി നിയന്ത്രണം വിട്ട സ്കൂട്ടർ മറിയുകയായിരുന്നു. പിന്നാലെ റോഡിലേക്ക് തെറിച്ചുവീണ മിഥിലാജിന്റെ ദേഹത്തുകൂടി ഈ റൂട്ടിൽ ഓടുന്ന പത്മം എന്ന സ്വകാര്യ ബസ് കയറി ഇറങ്ങുകയായിരുന്നു. ഉടൻ തന്നെ യുവാവിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ആറാട്ടുപുഴ എ ആർ സ്കൂട്ടർ വർക്ക് ഷോപ്പിലെ ജോലിക്കാരനായിരുന്നു മിഥിലാജ്. മാതാവ് : മുംതാസ്, സഹോദരി: മിസ് രിയ.