'ഇപ്പോൾ സമാധാനമായി' ​നെറ്റ്സിൽ പരിശീലനം നടത്തി രോഹിത്; വീഡിയോ

മുംബയ്: നെറ്റ്സിൽ ബാറ്റിംഗ് പരിശീലനം നടത്തുന്ന ഇന്ത്യൻ ‌ടീമിന്റെ ഏകദിന നായകൻ രോഹിത് ശർമ്മയുടെ വീഡിയോയാണ് ഇപ്പോൾ സോഷ്യൽ മീഡിയിൽ ചർച്ചയാകുന്നത്. രോഹിത് തന്നെയാണ് വീഡിയോ ഇൻസ്റ്രാഗ്രാമിലൂടെ പങ്കുവച്ചത്. " 'ഇപ്പോൾ സമാധാനമായി" എന്നാണ് രോഹിത് വീഡിയോയ്ക്ക് അടിക്കുറിപ്പ് നൽകിയിരിക്കുന്നത്. സമൂഹമാദ്ധ്യമങ്ങളിലുൾപ്പെടെയുള്ള ക്രിക്കറ്റ് പ്രേമികൾ വലിയ ആകാംക്ഷയോടെയാണ് ഹിറ്റ്മാന്റെ തിരിച്ചുവരവിനായി കാത്തിരിക്കുന്നത്.

ഇന്ത്യയുടെ മുൻ അസിസ്റ്റന്റ് കോച്ച് അഭിഷേക് നായരോടൊപ്പം കുറച്ചുനാളായി രോഹിത് പരിശീലനം നടത്തുന്നുണ്ട്. 2023 മാർച്ചിലാണ് അവസാനമായി ഇന്ത്യൻ കുപ്പായത്തിൽ താരം കളിച്ചത്. വരാനിരിക്കുന്ന ഓസ്‌ട്രേലിയയ്‌ക്കെതിരായ പരമ്പരയ്ക്കുള്ള ഇന്ത്യൻ ടീമിനെ തിരഞ്ഞെടുക്കുന്നതിന് മുന്നോടിയായാണ് അദ്ദേഹത്തിന്റെ പരിശീലനം. മൂന്ന് ഏകദിനവും അഞ്ച് ട്വന്റി 20 മത്സരങ്ങളും അടങ്ങുന്ന പര്യടനത്തിനായി അടുത്ത മാസമാണ് ടീം ഇന്ത്യ ഓസ്‌ട്രേലിയയിലേക്ക് പറക്കുന്നത്.

2013ൽ വെസ്റ്റിൻഡീസിനെതിരെ കൊൽക്കത്തയിൽ നടന്ന ടെസ്റ്റിൽ സെഞ്ച്വറി നേടിക്കൊണ്ടാണ് രോഹിത് അരങ്ങേറിയത്. 67 മത്സരങ്ങളിൽ നിന്നായി 12 സെഞ്ച്വറിയും 18 അർദ്ധ സെഞ്ച്വറിയുമടക്കം 4301 റൺസാണ് ടെസ്റ്റ് ക്രിക്കറ്റിൽ രോഹിത്തിന്റെ സമ്പാദ്യം. 212 റൺസാണ് ഹിറ്ര്‌മാന്റെ ടെസ്റ്റിലെ ഉയർന്ന സ്‌കോർ.