'അങ്ങ് കേസുകളിൽ പ്രതിയല്ലായിരുന്നോ?'; സുജിത്തിനെതിരായ പരാമർശത്തിൽ മുഖ്യമന്ത്രിക്കെതിരെ രാഹുൽ മാങ്കൂട്ടത്തിൽ

തിരുവനന്തപുരം: മുഖ്യമന്ത്രി പിണറായി വിജയനെതിരെ പുതിയ ഫേസ്ബുക്ക് പോസ്റ്റുമായി രാഹുൽ മാങ്കൂട്ടത്തിൽ എംഎൽഎ. കുന്നംകുളം പൊലീസ് അകാരണമായി മർദ്ദിച്ച യൂത്ത് കോൺഗ്രസ് നേതാവ് വിഎസ് സുജിത്തിനെക്കുറിച്ച് മുഖ്യമന്ത്രി നിയമസഭയിൽ ആരോപിച്ചതിനെതിരെയായിരുന്നു രാഹുലിന്റെ പ്രതികരണം. സുജിത്ത് 11 കേസുകളിലെ പ്രതിയെന്നായിരുന്നു മുഖ്യമന്ത്രിയുടെ പരാമർശം.

യൂത്ത് കോൺഗ്രസ് മണ്ഡലം പ്രസിഡന്റായ സുജിത്ത് കേസുകളിൽ പ്രതിയാകുന്നത് സ്വാഭാവികമാണെന്നായിരുന്നു രാഹുലിന്റെ പ്രതികരണം.സർക്കാരിന് എതിരെ സമരം ചെയ്തതിന്റെ പേരിൽ 100ൽ അധികം കേസുകളിൽ പ്രതികളായ സഹപ്രവർത്തകർ യൂത്ത് കോൺഗ്രസിലുണ്ടെന്നും രാഹുൽ കുറിച്ചു.

രാഹുൽ മാങ്കൂട്ടത്തിലിന്റെ ഫേസ്ബുക്ക് പോസ്റ്റിന്റെ പൂർണരൂപം

ബഹു മുഖ്യമന്ത്രി,

പൊതുപ്രവർത്തകനും, യൂത്ത് കോൺഗ്രസ് മണ്ഡലം പ്രസിഡന്റുമായ സുജിത് കേസുകളിൽ പ്രതിയാകുന്നത് സ്വഭാവികമാണ്. അതും അങ്ങ് കേരളത്തിന്റെ മുഖ്യമന്ത്രി ആയിരിക്കുമ്പോൾ. ഈ സർക്കാരിന് എതിരെ സമരം ചെയ്തതിന്റെ പേരൽ 100ൽ അധികം കേസുകളിൽ പ്രതികളായ സഹപ്രവർത്തകർവരെയുണ്ട് യൂത്ത് കോൺഗ്രസിൽ. അത് രാഷ്ട്രീയ കേസുകളാണ്.

അത് ഒരാളെ സ്റ്റേഷനിലിട്ട് ക്രൂരമായി മർദ്ദിക്കാനുള്ള. മാനദണ്ഡം അല്ലല്ലോ. ആ മാനദണ്ഡം വച്ചാണെങ്കിൽ അങ്ങ് കേസുകളിൽ പ്രതിയല്ലായിരുന്നോ? അങ്ങയുടെ ഒപ്പം പ്രവർത്തിക്കുന്ന മന്ത്രിമാർ പ്രതികൾ അല്ലേ?അങ്ങയെ പിന്തുണയ്ക്കുന്ന ഭരണപക്ഷ എംഎൽഎമാർ പ്രതികൾ അല്ലേ? അവരെയൊക്കെ സ്റ്റേഷനിലിട്ട് മർദ്ദിക്കുമോ?