സഞ്ചരിക്കുന്ന ആശുപത്രി

കിഴക്കമ്പലം: കിഴക്കമ്പലം പഞ്ചായത്തിൽ സഞ്ചരിക്കുന്ന ആശുപത്രിയ്ക്ക് തുടക്കമായി. കിഴക്കമ്പലം സബ്സെന്ററിൽ നടന്ന ചടങ്ങിൽ പ്രസിഡന്റ് മിനി രതീഷ് ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മി​റ്റി ചെയർപേഴ്‌സൺ ജെനിസ് പി. കാച്ചപ്പിള്ളി അദ്ധ്യക്ഷയായി. പഞ്ചായത്ത് സെക്രട്ടറി ടി. അജി, മെഡിക്കൽ ഓഫീസർ ഡോ. പ്രീതി, സ്​റ്റാൻഡിംഗ് കമ്മി​റ്റി ചെയർപേഴ്സൺമാരായ എ. ബിനു, ആർ. ബിന്ദു, ബ്ലോക്ക് പഞ്ചായത്ത് അംഗം കെ.വി. രാജു, ഡോ. മേഘ എന്നിവർ സംസാരിച്ചു. വയോജനങ്ങൾക്ക് ഉപകാരപ്രദമാകും വിധമാണ് ആശുപത്രി സജ്ജീകരിച്ചിട്ടുള്ളത്. നിശ്ചിത കേന്ദ്രങ്ങളിൽ മാസത്തിൽ രണ്ടു തവണ ഡോക്ടർമാരെത്തും. മരുന്നുൾപ്പടെയുള്ള സേവനം തീർത്തും സൗജന്യമാണ്.