അഞ്ചര കിലോ കഞ്ചാവുമായി രണ്ട് ബംഗാളികൾ പിടിയിൽ

പുനലൂർ: അഞ്ചര കിലോ കഞ്ചാവുമായി രണ്ട് ബംഗാൾ സ്വദേശികളെ പുനലൂർ റെയിൽവേ പൊലീസ് പിടികൂടി. പശ്ചിമ ബംഗാൾ സ്വദേശികളായ ഉജ്വൽ ഭാസ് (24), ശിവജന (24) എന്നിവരാണ് അറസ്റ്റിലായത്. ഇന്നലെ രാവിലെ എട്ടോടെ റെയിൽവേ പൊലീസ് പുനലൂർ റെയിൽവേ സ്റ്റേഷനിൽ നടത്തിയ പരിശോധനയിൽ പ്ലാറ്റ്ഫോമിൽ സംശയാസ്പദമായ രീതിയിൽ കണ്ട ഇവരെ ചോദ്യം ചെയ്തപ്പോഴാണ് കഞ്ചാവ് കണ്ടെത്തിയത്. രണ്ട് ബാഗുകളിലായി സൂക്ഷിച്ചിരുന്ന രണ്ട് വലിയ പൊതിയും ചില്ലറ വിൽപ്പനക്കായി പായ്ക്ക് ചെയ്തിരുന്ന അഞ്ച് മുതൽ ഇരുപത് ഗ്രാം തൂക്കം വരുന്ന ചെറിയ പൊതികളുമാണ് കണ്ടെടുത്തത്. എ.എസ്.ഐ വിജയകുമാർ, സി.പി.ഒമാരായ ബിജുരാജൻ, രഞ്ജിത്ത്, വിനോദ്, മനു, പ്രേംകുമാർ, അരുൺ മോഹൻ, സവിൻ കുമാർ എന്നിവരുടെ സംഘമാണ് കഞ്ചാവ് പിടികൂടിയത്.