കലാ സംവിധായകൻ മക്കട ദേവദാസ്​ അന്തരിച്ചു

കോഴിക്കോട്: കലാ സംവിധാനായകൻ കോഴിക്കോട് ചെറുകുളം കുനിയിൽ മക്കട ദേവദാസ് (78) അന്തരിച്ചു. ഇന്നലെ രാവിലെ പതിനൊന്നായിരുന്നു അന്ത്യം. വാർദ്ധക്യ സഹജമായ അസുഖങ്ങളെ തുടർന്ന് ചികിത്സയിലായിരുന്നു.

കുയിലിനെ തേടി,പ്രേംപൂജാരി,കാവൽമാടം,തിങ്കളാഴ്​ച നല്ല ദിവസം,അയനം,ബ്രഹ്​മരക്ഷസ്​,തുമ്പോളി കടപ്പുറം,സന്ധ്യ​ക്കെന്തിന്​ സിന്ദൂരം,കടമ്പ,വധു ഡോക്​ടറാണ് തുടങ്ങി നൂറോളം സിനിമകൾക്ക് കലാസംവിധാനം നിർവഹിച്ചു. തമിഴിൽ മനതിലിനും നിരവധി ടെലി സീരിയലുകൾക്കും കലാസംവിധാനം ചെയ്തിട്ടുണ്ട്.

സുൽത്താൻ വീട്ടിലൂടെ​ സംസ്ഥാന ടെലിവിഷൻ അവാർഡും നേടി. മങ്കയാണ്​ അവസാനം ചെയ്​ത ഹ്രസ്വ ചിത്രം. മുന്നൂറോളം ചിത്രങ്ങളുടെ തലക്കെട്ട് രൂപകല്പന ചെയ്തു. പെയിന്റിംഗിൽ ചെറുപ്പം മുതലേ താത്പര്യമുണ്ടായിരുന്ന ദേവദാസ് കോഴിക്കോട് എരഞ്ഞിപ്പാലത്ത് 'ശ്രീകല' സ്റ്റുഡിയോ നടത്തിയിരുന്നു. കായികതാരവും ശില്പിയും പെയിന്ററും അമ്മാവ​ന്റെ മകനുമായ പുത്തലത്ത്​ രാഘവനിൽ നിന്നാണ് ദേവദാസ് പെയിന്റിംഗിന്റെ പ്രാഥമിക പാഠങ്ങൾ പഠിച്ചത്. സിനിമയായിരുന്നു സ്വപ്നം. തുടർന്ന് ആർട്ടിസ്റ്റ് നമ്പൂതിരിയുടെ കത്തുമായി ചെന്നെെയിലേക്ക് തിരിച്ചു. സ്വയംവരം സിനിമയുടെ പിന്നണിയിലുണ്ടായിരുന്ന രമേശിനുള്ളതായിരുന്നു കത്ത്. അവിടെയെത്തിയപ്പോൾ രമേശിനെ കണാനായില്ല. യാദൃച്ഛികമായി ചെമ്മീൻ സിനിമയുടെ വസ്​ത്രാലങ്കാരം നടത്തിയ രാമചന്ദ്ര​നെ കണ്ടു. രാമചന്ദ്ര​നാണ് ദേവദാസിനെ സംവിധായകൻ പി.എൻ. മേനോ​ന്റെ വീട്ടിലെത്തിച്ചത്. അവിടെ വച്ച് ഒരു സിനിമയുടെ ടൈറ്റിലെഴുതാൻ മേനോ​ൻ ആവശ്യപ്പെട്ടു. എഴുതിയ ടൈറ്റിൽ ഇഷ്ടമായതോടെ മേനോ​ൻ ദേവദാസി​നെ കൂടെക്കൂട്ടി. തുടർന്നാണ് കലാ സംവിധാനത്തിലേക്ക് ദേവദാസ് എത്തിയത്. സംസ്കാരം ഇന്നലെ വെെകിട്ട് വെസ്റ്റ്ഹിൽ ശ്മശാനത്തിൽ നടത്തി. ഭാര്യ:തങ്കം. മകൾ:പ്രേംകല. മരുമകൻ:രമേശ് (യു.എസ്.എ).