'മലയാളം വാനോളം, ലാൽസലാം': മോഹൻലാലിന് ആദരം ഒക്ടോ.4ന്
തിരുവനന്തപുരം: രാജ്യത്തിന്റെ പരമോന്നത ബഹുമതി ദാദാസാഹിബ് ഫാൽക്കെ പുരസ്‌കാരം നേടിയ നടൻ മോഹൻലാലിന് സംസ്ഥാന സർക്കാരിന്റെ ആദരം. 'മലയാളം വാനോളം, ലാൽസലാം' എന്ന് പേരിൽ ഒക്ടോ.4ന് വൈകിട്ട് 5ന് സെൻട്രൽ സ്റ്രേഡിയത്തിൽ നടക്കുന്ന ചടങ്ങിൽ മുഖ്യമന്ത്രി പിണറായിവിജയൻ മോഹൻലാലിനെ ആദരിക്കും. ഇന്ത്യൻ ചലച്ചിത്രരംഗത്തേയും രാഷ്ട്രീയ,സാമൂഹിക മേഖലകളിലെയും പ്രമുഖ വ്യക്തിത്വങ്ങൾ ചടങ്ങിൽ പങ്കെടുക്കുമെന്ന് മന്ത്രി സജി ചെറിയാൻ വാർത്താസമ്മേളനത്തിൽ അറിയിച്ചു.
മന്ത്രി സജി ചെറിയാൻ അദ്ധ്യക്ഷനാകും. മന്ത്രിമാരായ വി.ശിവൻകുട്ടി, ജി.ആർ.അനിൽ എന്നിവർ മുഖ്യാതിഥികളാകും. മന്ത്രിമാർ, പ്രതിപക്ഷ നേതാവ്,എം.എൽ.എമാർ,മറ്റ് ജനപ്രതിനിധികൾ എന്നിവരും പങ്കെടുക്കും. ആദരിക്കലിന്റെ ഭാഗമായി മോഹൻലാലിനായുള്ള സംഗീതാർച്ചനയായി സംവിധായകൻ ടി.കെ.രാജീവ് കുമാർ അവതരിപ്പിക്കുന്ന രംഗാവിഷ്‌കാരം 'ആടാം നമുക്ക് പാടാം' മോഹൻലാൽ സിനിമകളിലെ നായികമാരും ഗായികമാരും ചേർന്ന് വേദിയിൽ എത്തിക്കും. ഗായികമാരായ സുജാത മോഹൻ,ശ്വേതാ മോഹൻ, സിത്താര,ആര്യ ദയാൽ,മഞ്ജരി,ജ്യോത്സ,മൃദുല വാര്യർ,നിത്യ മാമൻ,സയനോര,രാജലക്ഷ്മി,കൽപ്പന രാഘവേന്ദ്ര,റിമിടോമി,ദിശ പ്രകാശ് എന്നിവർ മോഹൻലാൽ സിനിമകളിലെ ഹൃദ്യമായ മെലഡികൾ അവതരിപ്പിക്കും. ലാൽ സിനിമകളിലെ നായികമാരായ ഉർവശി,ശോഭന, മഞ്ജു വാര്യർ,പാർവതി,കാർത്തിക,മീന,നിത്യ മേനൻ,ലിസി,രഞ്ജിനി,രമ്യ കൃഷ്ണൻ,ലക്ഷ്മി ഗോപാലസ്വാമി,ശ്വേതാ മേനോൻ,മാളവിക മോഹൻ എന്നിവർ സംസാരിക്കും. പരിപാടിയുടെ ലോഗോ മന്ത്രി ജി.ആർ.അനിൽ, മന്ത്രി വി.ശിവൻകുട്ടിക്ക് നൽകി പ്രകാശനം ചെയ്തു.
എം.എൽ.എമാരായ വി.ജോയ്,ആന്റണി രാജു,സാംസ്‌കാരിക വകുപ്പ് ഡയറക്ടർ ഡോ.ദിവ്യ എസ്.അയ്യർ,സംസ്ഥാന ചലച്ചിത്ര വികസന കോർപ്പറേഷൻ ചെയർമാൻ കെ.മധു,സംസ്ഥാന ചലച്ചിത്ര പ്രവർത്തക ക്ഷേമനിധി ബോർഡ് ചെയർമാൻ കെ.മധുപാൽ എന്നിവർ വാർത്താസമ്മേളനത്തിൽ പങ്കെടുത്തു