അറിവിന്റെ ആദ്യക്ഷരം നുണഞ്ഞ് കുരുന്നുകൾ

​കുന്നത്തൂർ: എസ്.എൻ.ഡി.പി യോഗം കുന്നത്തൂർ യൂണിയനിൽപ്പെട്ട മൈനാഗപ്പള്ളി 2248-ാം നമ്പർ ശാഖയിൽ നടന്ന വിദ്യാരംഭ ചടങ്ങ് ഏറെ ശ്രദ്ധേയമായി. ഇവിടെ വിജിലൻസ് കോട്ടയം യൂണിറ്റ് ഇൻസ്‌പെക്ടർ പ്രദീപ്‌ ആണ് കുരുന്നുകൾക്ക് ആദ്യാക്ഷരം കുറിച്ചത്. ശാഖാ പ്രസിഡന്റ് മുരളി, സെക്രട്ടറി പൊന്നപ്പൻ തുടങ്ങിയവർ ചടങ്ങിൽ പങ്കെടുത്തു. കുന്നത്തൂർ നെടിയവിള ഭഗവതി ക്ഷേത്രം, മൈനാഗപ്പള്ളി മണ്ണൂർക്കാവ് ക്ഷേത്രം, പോരുവഴി പനപ്പെട്ടി ആശ്രമം ദേവീക്ഷേത്രം, ശാസ്താംകോട്ട ധർമ്മശാസ്താ ക്ഷേത്രം, കാരാളിമുക്ക് കോതപുരം തലയിണക്കാവ് ശിവപാർവ്വതീ ക്ഷേത്രം, ആനയടി പഴയിടം നരസിംഹസ്വാമി ക്ഷേത്രം, പടിഞ്ഞാറെ കല്ലട തിരുവാറ്റ മഹാദേവർ ക്ഷേത്രം, ഐവർകാല ഭരണിക്കാവ് ഭദ്രകാളി ക്ഷേത്രം, ശൂരനാട് വടക്ക് കരിങ്ങാട്ടിൽ ശിവപാർവ്വതീ ക്ഷേത്രം, കോമളവല്ലീശ്വരം ക്ഷേത്രം, അഴകിയകാവ് ക്ഷേത്രം, ശൂരനാട് തെക്ക് കുമരഞ്ചിറ ക്ഷേത്രം, ഐവർകാല കിഴക്ക് കീച്ചപ്പള്ളിൽ ക്ഷേത്രം, പുത്തനമ്പലം ദേവീക്ഷേത്രം, കുന്നത്തൂർ കിഴക്ക് കൊക്കാംകാവ് ക്ഷേത്രം എന്നിവിടങ്ങളിലായിരുന്നു പ്രധാനമായും വിദ്യാരംഭ ചടങ്ങുകൾ നടന്നത്. കുന്നത്തൂർ, കീച്ചപ്പള്ളിൽ ദേവീക്ഷേത്രം, കുന്നത്തൂർ കിഴക്ക് കൊക്കാംകാവ് ക്ഷേത്രം, പോരുവഴി പെരുവിരുത്തി മലനട, അമ്പലത്തുംഭാഗം ധർമശാസ്താ ക്ഷേത്രം, കണത്താർകുന്നം മഹാദേവർ ക്ഷേത്രം, പള്ളിശ്ശേരിക്കൽ പാലമ്പള്ളിക്കാവ്, വടക്കൻ മൈനാഗപ്പള്ളി പാട്ടുപുരയ്ക്കൽ ക്ഷേത്രം എന്നിവിടങ്ങളിലും വിജയദശമി ദിവസം വലിയ തിരക്കാണ് അനുഭവപ്പെട്ടത്.

പടിഞ്ഞാറെ കല്ലട തലയിണക്കാവ് ശിവപാർവ്വതീ ക്ഷേത്രത്തിൽ നടന്ന വിദ്യാരംഭ ചടങ്ങിന് ക്ഷേത്രം ട്രസ്റ്റിയും മൈനാഗപ്പള്ളി മിലാദേ ഷെരീഫ് സ്കൂൾ അദ്ധ്യാപകനുമായ കല്ലട ഗിരീഷ് നേതൃത്വം നൽകി. പുത്തനമ്പലം ദേവീക്ഷേത്രത്തിൽ നടന്ന വിദ്യാരംഭ ചടങ്ങിൽ ക്ഷേത്രം മേൽശാന്തി നീലമന മഠം ഉണ്ണികൃഷ്ണ ശർമ്മയാണ് കുട്ടികൾക്ക് ആദ്യക്ഷരം കുറിച്ചത്. ക്ഷേത്രം പ്രസിഡന്റ് ടി.എ. സുരേഷ് കുമാർ അദ്ധ്യക്ഷനായി. ബി. ശ്രീകുമാർ, രവീന്ദ്രൻ പിള്ള, ജയകൃഷ്ണൻ, അജയ കുമാർ, മോഹനൻ പിള്ള, സുരേഷ് ബാബു എന്നിവർ നേതൃത്വം നൽകി.