ദേവസ്വത്തിന്റെ ചുമതല ഐ.എ.എസുകാർക്ക് നൽകണം: വെള്ളാപ്പള്ളി

സുൽത്താൻ ബത്തേരി: ദേവസ്വം ബോർഡ് സംവിധാനത്തെ അടിമുടി മാറ്റി ഉത്തരവാദിത്വം ഐ.എ.എസുകാർക്ക് നൽകണമെന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. സുൽത്താൻബത്തേരിയിൽ എസ്.എൻ.ഡി.പി യോഗം ശാഖാ നേതൃത്വ സംഗമത്തിൽ പങ്കെടുക്കാനെത്തിയപ്പോൾ മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം. ഐ.എ.എസുകാർ കള്ളംചെയ്യാൻ ഭയപ്പെടുമെന്നും ബോർഡിന്റെ നിയന്ത്രണം സർക്കാരിന്റെ നിയന്ത്രണത്തിലായിരിക്കണമെന്നും വെള്ളാപ്പള്ളി പറഞ്ഞു. ശബരിമല സ്വർണപ്പാളി വിഷയത്തിൽ സി.ബി.ഐ അന്വേഷണം വേണം. അഴിമതിയും കെടുകാര്യസ്ഥതയും കൊണ്ട് എന്നും വിവാദത്തിലാണ് തിരുവതാംകൂർ ദേവസ്വംബോർഡ്. സ്വർണപ്പാളി പോയിട്ട് കാലങ്ങളായി. പക്ഷേ ഈ ബോർഡാണ് കണ്ടുപിടിച്ചത്. ഏതുകാലത്താണ് സ്വർണപ്പാളി നഷ്ടപ്പെട്ടതെന്ന് എന്നതിൽ കൃത്യതവരുത്തണം. ഒരു പോറ്റി വിചാരിച്ചാൽ മാത്രം ഇത്രയും വലിയ സാധനം കൊണ്ടുപോകാനാകില്ല. ഇതിനുപിന്നിൽ വൻശക്തികളുണ്ട്. ആത്മീയതയുടെ പേരിൽ ജനങ്ങളെ ചൂഷണം ചെയ്യരുത്. പല രാഷ്ട്രീയക്കാർക്കും ഇടംകൊടുക്കാനുള്ള ഇടമായി ദേവസ്വം ബോർഡ് മാറിയതായും അദ്ദേഹം ആരോപിച്ചു.