കടലിനടിയിലൂടെ തുരങ്കപാത, കൊച്ചിയിൽ വരുന്നത് 2672 കോടി രൂപയുടെ വമ്പൻ പദ്ധതി
കൊച്ചി: തീരദേശ ഹൈവേയുടെ ഭാഗമായി ഫോർട്ട് കൊച്ചിയെയും വൈപ്പിനെയും കടലിനടിയിലൂടെ ബന്ധിപ്പിക്കുന്ന നിർദിഷ്ട ഇരട്ട തുരങ്കപാത നിർമാണത്തിന് സർക്കാർ താൽപ്പര്യപത്രം ക്ഷണിക്കുമെന്ന് കെ.ജെ.മാക്സി എം.എൽ.എ അറിയിച്ചു.
കെ-റെയിൽ സമർപ്പിച്ച സാധ്യതാപഠന റിപ്പോര്‍ട്ട് പരിഗണിച്ചാണ് സംസ്ഥാന ഗതാഗതവകുപ്പ് നിർദേശം. 2672.25 കോടി രൂപ ചെലവ് കണക്കാക്കുന്ന പദ്ധതി, ഡിസൈൻ-ബിൽഡ്-ഫിനാൻസ്-ഓപ്പറേറ്റ്-ട്രാൻസ്ഫർ മാതൃകയിൽ സ്വകാര്യ പങ്കാളിത്തത്തോടെ നടപ്പാക്കും. 9 ജില്ലകളിലൂടെ കടന്നുപോകുന്ന തീരദേശഹൈവേ എറണാകുളത്ത് ചെല്ലാനം മുതൽ മുനമ്പംവരെ 48 കിലോമീറ്ററാണുള്ളത്.
ഇരട്ട ടണലുകളിൽ മൂന്നരമീറ്റര വീതിയുള്ള സർവീസ് റോഡും നാലരമീറ്ററർ വീതിയിൽ ഹൈവേയുമാണ് നിർദേശിക്കുന്നത്. പുറത്തെ നാലുവരി അപ്രോച്ച് റോഡുകളിലേക്കാണ് ഇവ തുറക്കുക. ഒരോ 250 മീറ്ററിലും എമർജൻസി സ്റ്റോപ്പ് ബേ, 500 മീറ്ററിലും യാത്രക്കാർക്കുള്ള വെന്റിലേഷനോടുകൂടിയ എമർജൻസി എക്സിറ്റ് എന്നിവയുണ്ടാകും. കപ്പൽച്ചാലിന് കുറുകെ നിർമിക്കുന്ന തുരങ്കം കടലിൽ 35 മീറ്റർ ആഴത്തിലായിരിക്കും.