വരുന്നത് 34,000 കോടിയുടെ വികസനം; ഈ ജില്ലയുടെ മുഖം മാറും, തൊട്ടടുത്ത ജില്ലക്കും ഗുണം
തിരുവനന്തപുരം: വിഴിഞ്ഞം നാവായിക്കുളം ഔട്ടര്‍ റിംഗ് റോഡ് നിര്‍മ്മാണത്തിന് (എന്‍.എച്ച് 866) വീണ്ടും ജീവന്‍വച്ചു. ഇതോടെ റോഡിന് ഇരുവശത്തുമായി വിഭാവനം ചെയ്തിരിക്കുന്ന, 34000 കോടിയുടെ വികസനപദ്ധതികളും നടപ്പിലാക്കുമെന്ന പ്രതീക്ഷയിലാണ് നാട്ടുകാര്‍.
കേന്ദ്രമന്ത്രി നിധിന്‍ ഗഡ്കരിയുമായി മുഖ്യമന്ത്രി പിണറായി വിജയന്‍ നടത്തിയ ചര്‍ച്ചയിലാണ്,നിര്‍ദ്ദിഷ്ട അലൈന്‍മെന്റില്‍ മാറ്റം വരുത്താതെയും പരിസ്ഥിതിക്ക് കോട്ടം തട്ടാതെയും ഔട്ടര്‍റിംഗ് റോഡ് ഉടന്‍ നിര്‍മ്മിച്ചു തുടങ്ങാനാകുമെന്ന ധാരണയായത്.
പദ്ധതി യാഥാര്‍ത്ഥ്യമാകുന്നതോടെ വിഴിഞ്ഞം തുറമുഖ വികസനം വേഗത്തിലാകും. റിംഗ് റോഡിന്റെ തുടര്‍ച്ചയായി കടമ്പാട്ടുകോണത്തുനിന്ന് ആരംഭിക്കുന്ന കൊല്ലം ചെങ്കോട്ട ഗ്രീന്‍ഫീല്‍ഡ് ദേശീയപാത നിര്‍മ്മിക്കുന്നതോടെ വിഴിഞ്ഞത്തു നിന്നുള്ള ചരക്കുനീക്കം കൂടുതല്‍ സുഗമമാകും.നിര്‍മ്മാണം തുടങ്ങിക്കഴിഞ്ഞാല്‍ മൂന്നു വര്‍ഷത്തിനകം പൂര്‍ത്തിയാക്കാനാകുമെന്നാണ് വിലയിരുത്തല്‍.
സ്ഥലമേറ്റെടുപ്പിലേക്ക് നീങ്ങിയ പദ്ധതിയുടെ അലൈന്‍മെന്റ് മാറ്റാന്‍ തീരുമാനിച്ചതോടെയാണ് പാതിവഴിയിലായത്. ഔട്ടര്‍റിംഗ് റോഡിന്റെ അലൈന്‍മെന്റ് മാറ്റണമെന്നാവശ്യവുമായി ദേശീയപാത അതോറിട്ടിയും,അത് അപ്രായോഗികമാണെന്ന നിഗമനത്തില്‍ സംസ്ഥാന സര്‍ക്കാരും എത്തിയതോടെയാണ് പദ്ധതി തുലാസിലായത്. തുടര്‍ന്ന് മുഖ്യമന്ത്രി - കേന്ദ്രമന്ത്രി ചര്‍ച്ചയില്‍ പ്രശ്‌നത്തിന് പരിഹാരമായി.
വിഴിഞ്ഞം തുറമുഖ വികസനത്തിനുള്ള ഇടനാഴിയായി മാറുന്ന റിംഗ് റോഡ്
ആകെ ചെലവ്(പ്രതീക്ഷിക്കുന്നത്)- 7900 കോടി രൂപ
62.7 കലോമീറ്ററില്‍ നാലുവരിയായിട്ടാണ് റോഡ് നിര്‍മ്മിക്കുക
റോഡിനായി 314 ഹെക്ടര്‍ ഭൂമിയേറ്റെടുക്കണം
24 താലൂക്കുകളിലായുള്ള ഭൂമിയേറ്റെടുക്കല്‍ നടപടികള്‍ ഇനി പുനരാരംഭിക്കണം
8 സാമ്പത്തിക മേഖലകളിലായി ജില്ലയുടെ വികസനം
പദ്ധതി യാഥാര്‍ത്ഥ്യമായാല്‍ 8 പുതിയ സാമ്പത്തിക മേഖല ജില്ലയിലുണ്ടാകും.
വിഴിഞ്ഞം,കോവളം,കാട്ടാക്കട,നെടുമങ്ങാട്,വെമ്പായം,മംഗലപുരം,കിളിമാനൂര്‍,കല്ലമ്പലം എന്നിങ്ങനെയാണ് 8 സാമ്പത്തിക മേഖലകള്‍.
1 വിഴിഞ്ഞം (6.3 ചതുരശ്ര കിലോമീറ്റര്‍) - ലോജിസ്റ്റിക്‌സ് അടിസ്ഥാനമാക്കിയുള്ള വ്യവസായ ടൗണ്‍ഷിപ്പ്
2 കോവളം (4.01 ചതുരശ്ര കിലോമീറ്റര്‍) - ആരോഗ്യ ടൂറിസം ഹബ് 3 കാട്ടാക്കട (7.37 ച.കി.മീ) - ഗ്രീന്‍ ആന്‍ഡ് സ്മാര്‍ട്ട് വ്യവസായ ക്ലസ്റ്റര്‍ 4 നെടുമങ്ങാട് (5.58 ച.കി.മീ) - പ്രാദേശിക വ്യാപാരങ്ങളുടെയും സ്ഥാപനങ്ങളുടെയും ഹബ് 5വെമ്പായം (7.47 ച.കി.മീ) - മരുന്നിന്റെയും ഭക്ഷ്യവസ്തുക്കളുടെയും സംസ്‌കരണ ക്ലസ്റ്റര്‍ 6 മംഗലപുരം (6.37 ച.കി.മീ) - ലൈഫ് സയന്‍സിന്റെയും ഐ.ടിയുടെയും ഹബ് 7കിളിമാനൂര്‍ (5.28 ച.കി.മീ) - കാര്‍ഷിക,ഭക്ഷ്യ സംസ്‌കരണ ഉപകരണങ്ങള്‍ 8 കല്ലമ്പലം (8.28 ച.കി.മീ) - കാര്‍ഷിക,ഭക്ഷ്യ സംസ്‌കരണം