അടിമാലിയിൽ മണ്ണിടിച്ചിൽ; കുടുംബം മണ്ണിനടിയിൽ കുടുങ്ങി

ഇടുക്കി: അടിമാലി കൂമ്പൻപാറയിലെ ദേശീയപാതയിൽ മണ്ണിടിച്ചിൽ. അപകടാവസ്ഥയിൽ ഉണ്ടായിരുന്ന മണ്ണ് താഴേക്ക് പതിക്കുകയായിരുന്നു. മണ്ണിനടിയിൽ കുടുംബം കുടുങ്ങി കിടക്കുന്നതായി റിപ്പോർട്ട്. വീട്ടിലെ ഹാളിലാണ് ഇവർ കുടുങ്ങിയത്. രക്ഷപ്രവർത്തകരോട് കുടുംബം സംസാരിക്കുന്നതായും റിപ്പോർട്ടുണ്ട്. ബിജുവെന്നയാളും ഭാര്യ സന്ധ്യയുമാണ് കുടുങ്ങിക്കിടക്കുന്നത്. സ്ഥലത്ത് പൊലീസും അഗ്നിശമനസേനയും എത്തിയിട്ടുണ്ട്.രക്ഷാപ്രവർത്തനം നടത്തുകയാണ്.

സന്ധ്യയുമായി ഫോണിൽ ബന്ധപ്പെടാൻ സാധിച്ചിട്ടുണ്ട് എന്നാണ് വിവരം. വീടിന്റെ മുകളിലേക്ക് മണ്ണ് ഇടിഞ്ഞു വീഴുകയായിരുന്നു. വീടിന്റെ കോണ്‍ക്രീറ്റ് നീക്കി ഇരുവരെയും രക്ഷിക്കാനാണ് ശ്രമിക്കുന്നത്. ജെസിബി ഉപയോഗിച്ച് മണ്ണ് നീക്കുന്നതിനുള്ള ശ്രമമാണ് നിലവിൽ നടക്കുന്നത്. ജാക്കി വെച്ച് കോണ്‍ക്രീറ്റ് പാളികൾ ഉയർത്താനും ശ്രമിക്കുന്നുണ്ട്.

അടിമാലി ഉന്നതിയിൽ നിന്നും കുടുംബങ്ങളെ ക്യാമ്പിലേക്ക് മാറ്റിയിരിക്കുകയാണ്. ഉന്നതിക്ക് മുകൾ ഭാഗത്ത് വലിയ വിള്ളൽ രൂപപ്പെട്ടിട്ടുണ്ട്. അടിമാലി ഗവൺമെന്റ് സ്കൂളിൽ ക്യാമ്പ് തുറന്നു.