പ്രായം 23, റാങ്ക് 28; ഇതാ കേരളത്തില്‍ പ്രായം കുറഞ്ഞ ഒരു പഞ്ചായത്ത് സെക്രട്ടറി
പാലക്കാട്: ഒരു സര്‍ക്കാര്‍ ജോലിയെന്ന സ്വപ്‌നം യാഥാര്‍ത്ഥ്യമാക്കാന്‍ ലക്ഷക്കണക്കിന് ചെറുപ്പക്കാരാണ് അഹോരാത്രം കഠിനപ്രയത്‌നം നടത്തുന്നത്. സ്വകാര്യ ജോലികള്‍ ചെയ്ത ശേഷം ഒഴിവ് സമയങ്ങളില്‍ പഠനം മുന്നോട്ട് കൊണ്ടുപോകുന്നവര്‍, ഉള്ള ജോലി രാജിവച്ച് സര്‍ക്കാര്‍ സര്‍വീസില്‍ കയറാന്‍ കഷ്ടപ്പെട്ട് പഠിക്കുന്നവര്‍. അങ്ങനെ നിരവധി ചെറുപ്പക്കാരെ നമുക്ക് ചുറ്റും കാണാന്‍ കഴിയും. പാലക്കാട് ജില്ലയിലെ തിരുവേഗപ്പുറ പഞ്ചായത്ത് ഓഫീസിലെത്തിയാല്‍ പഞ്ചായത്ത് സെക്രട്ടറിയുടെ കസേരയില്‍ ഒരു 23കാരനെ കാണാം.
തിരുവേഗപ്പുറ പഞ്ചായത്ത് ഓഫീസിലെ പുതിയ സെക്രട്ടറിയാണ് കക്ഷി. പേര് എന്‍എന്‍ ധനരാജ്, വയസ്സ് 23. തൃശൂര്‍ ഇരിങ്ങാലക്കുട സ്വദേശിയായ ധനരാജ് കഴിഞ്ഞ മാസമാണ് സര്‍വീസില്‍ കയറിയത്. പാലക്കാട് ജില്ലയിലെ ഏറ്റവും പ്രായംകുറഞ്ഞ പഞ്ചായത്ത് സെക്രട്ടറിയും ധനരാജ് തന്നെയാണ്. തിരുവനന്തപുരത്ത് സിവില്‍ സര്‍വീസ് പരീക്ഷയ്ക്കുള്ള പരിശീലനത്തിലായിരിക്കുമ്പോഴാണ് ധനരാജ് പി.എസ്.സി പരീക്ഷ എഴുതി ജോലി നേടിയത്.
ജൂലായില്‍ പ്രസിദ്ധീകരിച്ച റാങ്ക് പട്ടികയില്‍ 28-ാം റാങ്കുകാരനായിരുന്നു ധനരാജ്. അധികംതാമസിയാതെ നിയമനവും വന്നു. തൃശ്ശൂര്‍ കേരളവര്‍മ കോളേജില്‍നിന്ന് ബിരുദംപൂര്‍ത്തിയാക്കിയിട്ടുണ്ട്. ആദ്യം എഴുതിയ പഞ്ചായത്ത് സെക്രട്ടറി തസ്തികയിലേക്കുള്ള പരീക്ഷയില്‍ത്തന്നെ ജോലിയും ലഭിച്ചുവെങ്കിലും സിവില്‍ സര്‍വീസ് എന്ന ലക്ഷ്യം ഉപേക്ഷിക്കാന്‍ ധനരാജ് തയ്യാറല്ല.പഞ്ചായത്തിന്റെ രണ്ട് ഭരണസമിതിയോഗങ്ങളില്‍ പങ്കെടുത്തു. എല്ലാവരെയും തുല്യപ്രാധാന്യത്തോടെ കണ്ടുകൊണ്ടുള്ള പ്രവര്‍ത്തനവുമായി മുന്നോട്ട് പോകുമെന്നും ധനരാജ് പറഞ്ഞു.
ഇരിങ്ങാലക്കുട നെടുമ്പാള്‍മഠത്തില്‍ നാരായണന്‍ എമ്പ്രാന്തിരിയുടെ മകനാണ്. അമ്മ സാവിത്രി. സഹോദരി ധനശ്രീ.