നിയന്ത്രണം വിട്ട കാർ ബൈക്കിലിടിച്ച് നവദമ്പതികൾക്ക് ദാരുണാന്ത്യം; കഴിഞ്ഞ ജനുവരിയിൽ കല്യാണം

മലപ്പുറം: കാർ നിയന്ത്രണം വിട്ട് ബൈക്കിലിടിച്ച് ബൈക്ക് യാത്രികരായ നവദമ്പതികൾക്ക് ദാരുണാന്ത്യം. മലപ്പുറം പുത്തനത്താണി-തിരുനാവായ റോഡിൽ ഇഖ്‌ബാൽ നഗറിലാണ് സംഭവം. ചന്ദനക്കാവ് ഇഖ്‌ബാൽ നഗറിലെ വലിയ പീടിയേക്കൽ മുഹമ്മദ് സിദ്ദിഖ് (30) ഭാര്യ റീസ മൻസൂർ (26) എന്നിവരാണ് മരിച്ചത്. ജനുവരിയിലായിരുന്നു ഇവരുടെ വിവാഹം.

ഇന്ന് രാവിലെ ഒൻപത് മണിയോടെയായിരുന്നു അപകടം. ഇരുവരും ജോലി സ്ഥലത്തേയ്ക്ക് പോവുകയായിരുന്നു. പുത്തനത്താണി ഭാഗത്തേയ്ക്ക് പോവുകയായിരുന്ന ബൈക്കും എതിർദിശയിൽ വന്ന കാറും തമ്മിൽ കൂട്ടിയിടിക്കുകയായിരുന്നു. അപകടത്തിന് പിന്നാലെ ഇരുവരെയും ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ചേരുരാൽ സ്‌കൂളിലെ റിട്ടയേർഡ് പ്രഥമാദ്ധ്യാപകനായ വി പി അഹമ്മദ് കുട്ടിയുടെയും റിട്ടയേർഡ് അദ്ധ്യാപിക സുനീറ ബാനുവിന്റെയും മകനാണ് മുഹമ്മദ് സിദ്ദിഖ്. റീസ ഏറനാട് സ്വദേശിനിയാണ്. അപകടത്തിന് പിന്നാലെ കൽപകഞ്ചേരി പൊലീസ് സ്ഥലത്തെത്തി മേൽനടപടികൾ സ്വീകരിച്ചു. മൃതദേഹങ്ങൾ പുത്തനത്താണി ആശുപത്രിയിലേയ്ക്ക് മാറ്റി. നടപടികൾക്ക് ശേഷം ബന്ധുക്കൾക്ക് വിട്ടുനൽകും.