ലോകകപ്പ് സെമി: ലോറ വോള്‍വാര്‍ട്ടിന് തകര്‍പ്പന്‍ സെഞ്ച്വറി, ഇംഗ്ലണ്ടിനെതിരെ ദക്ഷിണാഫ്രിക്കയ്ക്ക് കൂറ്റന്‍ സ്‌കോര്‍

ഗുവാഹത്തി: വനിതാ ക്രിക്കറ്റ് ലോകകപ്പിലെ ഒന്നാം സെമിഫൈനലില്‍ ഇംഗ്ലണ്ടിനെതിരെ ദക്ഷിണാഫ്രിക്കയ്ക്ക് കൂറ്റന്‍ സ്‌കോര്‍. ക്യാപ്റ്റന്‍ ലോറ വോള്‍വാര്‍ട്ടിന്റെ തകര്‍പ്പന്‍ സെഞ്ച്വറി 169 (143) മികവില്‍ ആദ്യം ബാറ്റ് ചെയ്ത പ്രോട്ടീസ് പടുത്തുയര്‍ത്തിയത് 50 ഓവറില്‍ ഏഴ് വിക്കറ്റ് നഷ്ടത്തില്‍ 319 റണ്‍സ്. 20 ബൗണ്ടറികളും നാല് സിക്‌സറുകളും ഉള്‍പ്പെടുന്നതായിരുന്നു ദക്ഷിണാഫ്രിക്കന്‍ നായികയുടെ ഇന്നിംഗ്‌സ്.

ക്യാപ്റ്റന് ഒപ്പം ഇന്നിംഗ്‌സ് ഓപ്പണ്‍ ചെയ്ത തസ്മിന്‍ ബ്രിറ്റ്‌സ് 45(65) റണ്‍സ് നേടി. ഒന്നാം വിക്കറ്റില്‍ ഇരുവരും ചേര്‍ന്ന് 116 റണ്‍സാണ് അടിച്ചെടുത്തത്. പിന്നാലെ വന്ന അനേക ബോഷ് 0(3), സുന്‍ ലൂസ് 1(6) എന്നിവര്‍ നിരാശപ്പെടുത്തിയെങ്കിലും ഒരുവശത്ത് ലോറ വോള്‍വാര്‍ട്ട് തകര്‍ത്തടിച്ചു. മാറിസൈന്‍ ക്യാപ് 42(33) റണ്‍സ് നേടി മദ്ധ്യ ഓവറുകളില്‍ ലോറയ്‌ക്കൊപ്പം ദക്ഷിണാഫ്രിക്കന്‍ സ്‌കോറിംഗ് മുന്നോട്ടുകൊണ്ടുപോയി.

വിക്കറ്റ് കീപ്പര്‍ സിനോലോ ജാഫ്ത 1(4), അനെറി ഡെര്‍ക്‌സെന്‍ 4(14) എന്നിങ്ങനെയാണ് പുറത്തായ മറ്റ് ബാറ്റര്‍മാരുടെ സ്‌കോറുകള്‍. ക്ലോയി ട്രയോണ്‍ 33*(26), നദീന്‍ ഡി ക്ലെര്‍ക്ക് 11*(6) എന്നിവര്‍ പുറത്താകാതെ നിന്നു. ഇംഗ്ലണ്ടിന് വേണ്ടി സോഫി എക്കിള്‍സ്റ്റണ്‍ നാല് വിക്കറ്റുകള്‍ വീഴ്ത്തി ബൗളിംഗില്‍ തിളങ്ങി. ലോറന്‍ ബെല്ലിന് രണ്ട് വിക്കറ്റ് ലഭിച്ചപ്പോള്‍ ക്യാപ്റ്റന്‍ നാറ്റ് സിവര്‍ ബ്രണ്ട് ഒരു വിക്കറ്റ് വീഴ്ത്തി.