നാടി​ന്റെ നൊമ്പരമായി​ നി​രഞ്ജൻ

കൊട്ടാരക്കര: പുത്തൂരിൽ പൊട്ടക്കിണറ്റിൽ വീണുമരിച്ച അഞ്ചാം ക്ളാസ് വിദ്യാർത്ഥി നിരഞ്ജന്റെ (10) മൃതദേഹം വീട്ടുവളപ്പിൽ സംസ്കരിച്ചു. ഇന്നലെ രാവിലെ പോസ്റ്റുമോർട്ടത്തിന് ശേഷം വീട്ടിലെത്തിച്ച മൃതദേഹത്തിൽ ആദരാഞ്ജലി അർപ്പിക്കാൻ നാട്ടുകാരും കൂട്ടുകാരുമടക്കം വൻ ജനാവലി കാത്തുനിന്നിരുന്നു.

പൊതുദർശനത്തിന് ശേഷം 2 മണിയോടെയാണ് വീട്ടവളപ്പിൽ സംസ്കരിച്ചത്. പവിത്രേശ്വരം കെ.എൻ.എൻ.എം.എച്ച്.എസ്.എസിലെ വിദ്യാർത്ഥിയാണ് നിരഞ്ജൻ. ചൊവ്വാഴ്ച വൈകിട്ട് ആറരയോടെ ട്യൂഷൻ സെന്ററിൽ നിന്നു സമീപത്തെ കാവിൽ പായസം വാങ്ങാൻ പോയതാണ് കുട്ടി. മറ്റൊരു കുട്ടിയെ തിരികെ കൊണ്ടുവിടാൻ പോയി മടങ്ങുമ്പോൾ കാൽവഴുതി കി​ണറ്റിൽ വീണതാകുമെന്നാണ് നിഗമനം. തേവലപ്പുറം കരുവായം കൊച്ചുവീട്ടിൽ സി.ലിജിയുടെയും ലക്ഷ്മി രാജിന്റെയും മകനാണ്. ക്ളാസ് ലീഡറായിരുന്ന നിരഞ്ജൻ അദ്ധ്യാപകർക്കും മറ്റ് വിദ്യാർത്ഥികൾക്കുമൊക്കെ പ്രിയപ്പെട്ടവനായിരുന്നു. നന്നായി പഠിക്കും. കലാ പരമായും മികവുണ്ട്. ഏതിനും മുന്നിലുണ്ടാകും. ആ നിലയിൽ എല്ലാവരുടെയും ഇഷ്ടം നേടിയെടുത്ത കുട്ടിയാണ് അപ്രതീക്ഷിതമായി കടന്നുപോയത്. ഇന്നലെ സ്കൂളിലെ അദ്ധ്യാപകരും നിരഞ്ജന്റെ കൂട്ടുകാരുമൊക്കെ വിങ്ങിപ്പൊട്ടി​യാണ് അവന് യാത്രാമൊഴി​യേകി​യത്.