ഉത്സവക്കുതിപ്പിൽ വാഹന വിപണി

ജി.എസ്.ടി ഇളവ് ഉപഭോക്താക്കൾക്ക് ആവേശമായി

കൊച്ചി: നവരാത്രി, ദീപാവലി ഉത്സവ കാലയളവിൽ രാജ്യത്തെ വാഹന വിപണിയിൽ ചരിത്ര മുന്നേറ്റം. 42 ദിവസത്തെ ഇക്കാലയളവിൽ രണ്ട് സെക്കൻഡിൽ ഓരോ കാറും ഓരോ സെക്കൻഡിലും മൂന്ന് ഇരു ചക്ര വാഹനങ്ങളുടെയും വിൽപ്പനയാണ് നേടിയത്. കാറുകളും സ്‌പോർട്ട്‌സ് യൂട്ടിലിറ്റി വാഹനങ്ങളും വാനുകളുമടക്കം 7.76 ലക്ഷം യൂണിറ്റുകളുടെ വിൽപ്പനയാണ് ഉത്സവ കാലയളവിൽ നടന്നത്. ഇരുചക്ര വാഹനങ്ങളുടെ വിൽപ്പന 40.5 ലക്ഷം കവിഞ്ഞു. പ്രതിദിനം 18,261 യാത്രാ വാഹനങ്ങളും 96,500 ഇരുചക്ര വാഹനങ്ങളും വിറ്റഴിച്ചു.

ഫെഡറേഷൻ ഒഫ് ഓട്ടോമൊബൈൽ ഡീലേഴ്‌സ് അസോസിയേഷന്റെ(എഫ്.എ.ഡി.എ) കണക്കുകളനുസരിച്ച് യാത്രാ, ഇരുചക്ര വാഹന വിൽപ്പനയിൽ 23 ശതമാനത്തിനടുത്ത് വിൽപ്പന ഇത്തവണത്തെ ഉത്സവ കാലയളവിലുണ്ടായി. ജി.എസ്.ടി നിരക്കുകളിലുണ്ടായ ഗണ്യമായ കുറവാണ് വിപണിയിൽ ഉപഭോക്താക്കൾക്ക് ആവേശം പകർന്നത്.