മണി​യാശാന്റെ മനസ് നി​റയെ വരവർണങ്ങൾ

71-ാം വയസിലും ചിത്രരചനയിൽ സജീവം

കൊല്ലം: വയസ് 71ൽ എത്തി​യെങ്കി​ലും മണി​യാശാന്റെ പകലി​രവുകളി​ൽ വര വർണങ്ങൾ നി​റഞ്ഞു നി​ൽക്കുകയാണ്. ഇതി​നോടകം വരച്ചു കൂട്ടി​യത് അയ്യായി​രത്തി​ലധി​കം ചി​ത്രങ്ങൾ. വാട്ടർ കളർ, ഇനാമൽ പെയി​ന്റ്, എണ്ണച്ചായം, അക്രൈലി​ക് എന്നു വേണ്ട എന്തും വഴങ്ങും ആ വി​രലുകൾക്ക്.

കുണ്ടറ മുളവന സ്വദേശിയായ എൻ.എസ്. മണിയെന്ന, നാട്ടുകാരുടെ പ്രിയപ്പെട്ട മ​ണി​യാ​ശാ​ൻ പത്താം വയസി​ലാണ് വരയുടെ ലോകത്ത് പി​ച്ചവച്ചു തുടങ്ങി​യത്. ഇതുവരെ വരച്ച മുഖച്ചിത്രങ്ങൾ മാത്രം രണ്ടായിരത്തോളം വരും. എം.ടിയും ഐ.എം.വിജയനും ജവഹർലാൽ നെഹ്റുവും ഉൾപ്പെടെ പ്ര​ശ​സ്ത​രും അ​പ്ര​ശ​സ്ത​രും സു​ഹൃ​ത്തു​ക്ക​ളുമൊക്കെ ഇതി​ൽ ഉൾപ്പെടുന്നു. ര​വി​വ​ർ​മ ചി​ത്ര​ങ്ങൾ അടക്കം ക്യാ​ൻ​വാ​സി​ലേക്ക് പ​ക​ർ​ത്തി. ആവശ്യപ്രകാരം നിരവധി ആരാധനാലയങ്ങളിലേക്കും ചിത്രങ്ങൾ വരച്ച് നൽകിയിട്ടുണ്ട്. കൊ​ല്ലം, പ​ത്ത​നം​തി​ട്ട, കോ​ട്ട​യം, തി​രു​വ​ന​ന്ത​പു​രം ജി​ല്ല​ക​ളി​ലടക്കം മണി​യാശാന്റെ ചി​ത്രങ്ങൾക്ക് ആവശ്യക്കാരേറെയാണ്.

ഗുരുക്കൻമാർ ആരുമി​ല്ലെന്നതാണ് മണിയാശാന്റെ പ്രത്യേകത. അമ്മ ജാനകിയമ്മാളിന്റെ പിന്തുണയാണ് ചിത്രരചനയിലേക്ക് നയിച്ചത്. ഒരു ചിത്രം വരച്ചാലുടൻ അമ്മയെ മാത്രം കാണിക്കും. അമ്മയ്ക്കിഷ്ടപ്പെട്ടാൽ പിന്നെ ശേഖരത്തിലേക്ക് മാറ്റും. അച്ഛൻ നാണു ആചാരി പ്രത്യക്ഷത്തിൽ പിന്തുണച്ചില്ലെങ്കിലും മകന്റെ കഴിവിൽ അഭിമാനി​ച്ചി​രുന്നു. എസ്.എസ്.എൽ.സി കഴിഞ്ഞെങ്കിലും ചിത്ര രചനയെ ഉപജീവനമാർഗമാക്കി​. ഇളമ്പള്ളൂർ ശിഖാ നിവാസിലാണ് താമസം. ഭാര്യ: ലതാമണി. മക്കൾ ശ്രീരേഖ എസ്.മണി, ശ്രീരാജ് എസ്.മണി എന്നിവരും ചിത്രരചനയി​ൽ കഴി​വ് തെളി​യി​ച്ചവരാണ്.

സ്വപ്നം ആർട്ട് ഗ്യാലറി

വീട്ടിലെ മുറികളിൽ ഒന്നിനുമേൽ ഒന്നായി അടുക്കി വച്ചിരിക്കുന്ന ചിത്രങ്ങൾ ന​ന്നാ​യി സൂ​ക്ഷി​ക്കാ​നും പ്ര​ദ​ർശിപ്പിക്കാനും ഒരു ആർട്ട് ഗ്യാലറിയാണ് മണി​യാശാന്റെ സ്വപ്നം. സ്ഥലം ഉണ്ടെങ്കിലും സമ്പത്തിക പ്രതിസന്ധിയാണ് തടസമായി​ നി​ൽക്കുന്നത്. മുഖച്ചിത്രങ്ങൾ വരച്ച് ഗിന്നസിൽ ഇടം നേടാനുള്ള ശ്രമത്തിലാണ് ഇദ്ദേഹം. 'മണിച്ചിത്രമേളം 25' എന്ന പേരിൽ മേരാ ഘർ ഇന്ത്യ കൊല്ലം ചാപ്ടറിന്റെ സഹകരണത്തോടെ കൊല്ലം പബ്ലിക് ലൈബ്രറി ക്വയിലോൺ ആർട്ട് ഗ്യാലറിയിൽ നടക്കുന്ന, മണി​യാശാന്റെ ചിത്ര പ്രദർശനം ഇന്ന് അവസാനിക്കും.