മന്നം ജയന്തി ആഘോഷം ജനു. 1,2 തീയതികളിൽ

കോട്ടയം: മന്നത്തുപദ്‌മനാഭന്റെ ജന്മദിനാഘോഷം ജനുവരി 1, 2 തീയതികളിൽ പെരുന്നയിലെ എൻ.എസ്.എസ് ആസ്ഥാനത്ത് നടക്കും. ഒന്നിന് രാവിലെ 7ന് മന്നം സമാധിയിൽ പുഷ്പാർച്ചന. 10.30ന് അഖിലകേരള നായർ പ്രതിനിധിസമ്മേളനത്തിൽ എൻ.എസ്.എസ് ജനറൽ സെക്രട്ടറി ജി.സുകുമാരൻനായർ സംഘടന പ്രവർത്തനങ്ങളെപ്പറ്റി വിശദീകരിക്കും. പ്രസിഡന്റ് ഡോ.എം.ശശികുമാർ അദ്ധ്യക്ഷത വഹിക്കും. ഹരികുമാർ കോയിക്കൽ നന്ദി പറയും. വൈകിട്ട് മൂന്നിന് കുന്നക്കുടി ബാലമുരളീകൃഷ്ണന്റെ സംഗീത കച്ചേരി,6.30ന് ചലച്ചിത്രതാരം ആശാശരത്തിന്റെ നൃത്തസന്ധ്യ. രാത്രി 9ന് മേജർ സെറ്റ് കഥകളി. രണ്ടിന് രാവിലെ 7ന് മന്നംസമാധിയിൽ പുഷ്പാർച്ചന. 11ന് നടക്കുന്ന മന്നം ജയന്തി സമ്മേളനം ദേശീയ ന്യൂനപക്ഷ കമ്മിഷനംഗം ഡോ.സിറിയക് തോമസ് ഉദ്ഘാടനം ചെയ്യും. ഡോ.എം.ശശികുമാർ അദ്ധ്യക്ഷത വഹിക്കും. കവിയും ഗാനരചയിതാവുമായ രാജീവ് ആലുങ്കൽ അനുസ്മരണപ്രഭാഷണം നടത്തും. ജി.സുകുമാരൻനായർ,അഡ്വ.എൻ.വി.അയ്യപ്പൻപിള്ള എന്നിവർ പ്രസംഗിക്കും.