പ്രചാരണത്തിനിടെ സംഘർഷം; കൊച്ചിയിൽ സ്വതന്ത്രസ്ഥാനാർത്ഥിക്ക് കുത്തേറ്റു, വ്യക്തിവൈരാഗ്യമെന്ന് പൊലീസ്

കൊച്ചി: ചേന്ദമംഗലത്ത് സ്വതന്ത്രസ്ഥാനാർത്ഥിക്ക് കുത്തേ​റ്റു. മുൻ സിപിഎം നേതാവ് ഫസൽ റഹ്മാനാണ് കുത്തേ​റ്റത്. സംഭവത്തിൽ വടക്കേക്കര സ്വദേശി മനോജിനെ പൊലീസ് അറസ്​റ്റ് ചെയ്തു. വ്യക്തിവൈരാഗ്യത്തിന്റെ പേരിലായിരുന്നു ആക്രമണമെന്നാണ് പൊലീസ് നൽകുന്ന വിവരം. വ്യവസായം ആരംഭിക്കുന്നതുമായി ബന്ധപ്പെട്ട് നടത്തിയ ചർച്ചയ്‌ക്കൊടുവിലാണ് ഇരുവരും തമ്മിൽ തർക്കമുണ്ടായത്.

ഇതിനുപിന്നാലെ മനോജ്, ഫസലിനെതിരെ തേക്കുമരം മുറിച്ചെന്ന് ആക്ഷേപം ഉന്നയിച്ച് ഫേസ്ബുക്കിൽ പോസ്​റ്റിട്ടിരുന്നു. ഇതിനെ തുടർന്ന് ഇന്നലെ വൈകുന്നേരം മനോജും ഫസലും വീണ്ടും പ്രചാരണത്തിനിടെ തർക്കമുണ്ടായി. സംഘർഷം രൂക്ഷമായതോടെ ഫസലിനെ മനോജ് മൂന്നുതവണ കുത്തുകയായിരുന്നു. ഫസൽ ഇപ്പോൾ ആശുപത്രിയിൽ ചികിത്സയിലാണ്. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്. ഫസൽ സിപിഎമ്മിന്റെ ബ്രാഞ്ച് സെക്രട്ടറിയും മുൻ പഞ്ചായത്തംഗവുമായിരുന്നു. ഇത്തവണ സീ​റ്റ് നിഷേധിച്ചതിനെ തുടർന്നാണ് ഫസൽ സ്വതന്ത്ര സ്ഥാനാർത്ഥിയായി മത്സരിക്കാൻ തീരുമാനിച്ചത്. ഇതോടെ പാർട്ടിയിൽ നിന്നും കഴിഞ്ഞ ദിവസം പുറത്താക്കിയിരുന്നു.