രാഗം സുനിലിനെ ആക്രമിച്ച ക്വട്ടേഷൻ സംഘാംഗം അറസ്റ്റിൽ

Sunday 30 November 2025 1:29 AM IST

തൃശൂർ: രാഗം തിയേറ്റർ നടത്തിപ്പുകാരൻ സുനിൽ കുമാറിനെ വെട്ടി പരിക്കേൽപ്പിച്ച സംഭവത്തിൽ ഒളിവിൽ കഴിഞ്ഞിരുന്ന ക്വട്ടേഷൻ സംഘാംഗം പത്തനംതിട്ട അടൂർ സ്വദേശി കാർത്തിക്കിനെ (35) പൊലീസ് അറസ്റ്റ് ചെയ്തു. തൃശൂരിൽ നിന്നാണ് ഇയാളെ പിടികൂടിയത്. നേരത്തെ പിടിയിലായിരുന്ന മണ്ണുത്തി സ്വദേശി സിജോയാണ് ക്വട്ടേഷൻ നൽകിയത്. സുനിലിനെ ആക്രമിച്ച മൂന്ന് പേരിൽ രണ്ട് പേരെ നേരത്തെ അറസ്റ്റ് ചെയ്തിരുന്നു. തെളിവെടുപ്പിനിടെ കാർത്തിക്കിനെ സുനിൽ തിരിച്ചറിഞ്ഞു. സിജോ ക്വട്ടേഷൻ ഏറ്റെടുത്തത് പ്രവാസി വ്യവസായിയായ റാഫേലിന് വേണ്ടിയാണെന്ന പരാതിയിൽ പൊലീസ് ലുക്കൗട്ട് നോട്ടീസ് പുറത്തിറക്കി. റാഫേലിനെ ചോദ്യം ചെയ്താലേ ആരാണ് ക്വട്ടേഷൻ നൽകിയതെന്ന് വ്യക്തമാകൂവെന്ന് പൊലീസ് പറഞ്ഞു. ഈ സംഭവത്തിൽ ഇതുവരെ ആറുപേരെ പിടികൂടി. ക്വട്ടേഷൻ നൽകിയ പ്രവാസി വ്യവസായിയുമായുള്ള സാമ്പത്തിക തർക്കമാണ് ആക്രമണത്തിന് പിന്നിലെന്നാണ് പൊലീസിന് ലഭിച്ച വിവരം. ഈ വിഷയവുമായി ബന്ധപ്പെട്ട് മാസങ്ങൾക്ക് മുമ്പ് സിജോ രാഗം തിയേറ്ററിലെത്തി സുനിൽകുമാറിനെ ഭീഷണിപ്പെടുത്തിയിരുന്നു.