വഖഫ് ഭൂമി: മുനമ്പം സമരം ഇന്ന് തീരും
• നിയമമന്ത്രി പി. രാജീവ് സമരസേനാനികൾക്ക് നാരങ്ങാനീര് നൽകും
വൈപ്പിൻ: വഖഫ് നിയമത്തിൽ കുരുങ്ങിയതിനെ തുടർന്ന് 415 ദിവസമായി നടന്നുവന്ന മുനമ്പം ഭൂസംരക്ഷണ സമിതിയുടെ റിലേ നിരാഹാരസമരത്തിന് ഇന്ന് 2.30ന് സമാപനം. മുനമ്പം വേളാങ്കണ്ണി മാതാ പള്ളിമുറ്റത്തെ സമരപ്പന്തലിൽ നിയമമന്ത്രി പി. രാജീവ് സമരസേനാനികൾക്ക് നാരങ്ങാനീര് നൽകും. കെ.എൻ. ഉണ്ണിക്കൃഷ്ണൻ എം.എൽ.എയും സമുദായ സംഘടനാ നേതാക്കളും പങ്കെടുക്കും.
ഹൈക്കോടതി വിധിയെത്തുടർന്ന് 250 ഓളം കുടുംബങ്ങൾ കുഴുപ്പിള്ളി വില്ലേജ് ഓഫീസിൽ കരം അടച്ച സാഹചര്യത്തിലാണ് സമരം അവസാനിപ്പിക്കാൻ സംരക്ഷണസമിതി കോർകമ്മിറ്റി തീരുമാനിച്ചത്.
1950ൽ സിദ്ദിഖ് സേട്ട് കോഴിക്കോട് ഫാറൂഖ് കോളേജിന് ദാനമായി നൽകിയതാണ് മുനമ്പത്തെ തർക്കഭൂമി. കേസുകളെത്തുടർന്ന് താമസക്കാർ കോളേജിൽനിന്ന് ഭൂമി വിലയ്ക്കുവാങ്ങി. 614 കുടുംബങ്ങൾ ഇപ്പോൾ താമസിക്കുന്നുണ്ട്. ഭൂമിയിൽ 2019ൽ കേരള വഖഫ് ബോർഡ് അവകാശമുന്നയിച്ചതോടെയാണ് പ്രശ്നമായത്. 2022 മുതൽ ഉടമകൾക്ക് കരമടയ്ക്കാൻ സാധിച്ചിരുന്നില്ല. കേന്ദ്ര വഖഫ് നിയമഭേദഗതി നീക്കത്തിൽ മുനമ്പം ഭൂമിയും വലിയ പങ്കുവഹിച്ചു. ഭൂമി വഖഫ് ആക്കിയത് ഹൈക്കോടതി റദ്ദുചെയ്യുകയും കരംസ്വീകരിക്കാൻ കഴിഞ്ഞദിവസം നിർദ്ദേശിക്കുകയും ചെയ്തതോടെയാണ് പ്രശ്നപരിഹാരത്തിന് വഴിതെളിഞ്ഞത്.
• രാഷ്ട്രീയപ്പോരാട്ടം വഴിത്തിരിവിൽ
യു.ഡി.എഫിനും എൽ.ഡി.എഫിനും മുനമ്പത്ത് പ്രവേശിക്കാനാവാത്ത സ്ഥിതിയുണ്ടായപ്പോൾ ബി.ജെ.പിയാണ് രാഷ്ട്രീയനേട്ടം കൊയ്തത്. കേന്ദ്ര നിയമമന്ത്രി ഉൾപ്പെടെ ദേശീയ നേതാക്കൾ മുനമ്പത്തെത്തി. കേന്ദ്ര വഖഫ് ഭേദഗതി നിയമം പാസാക്കിയെങ്കിലും ഹൈക്കോടതി വിധിയെത്തുടർന്നാണ് കരം അടയ്ക്കാനായത്. അത് വേഗത്തിലാക്കാൻ സംസ്ഥാനസർക്കാർ സഹായിച്ചു. സമരം സമാപിക്കുമ്പോൾ പ്രതിസന്ധിക്കാലത്ത് ഒപ്പം നിന്ന ബി.ജെ.പിക്കാരെ ക്ഷണിച്ചിട്ടില്ല. കേന്ദ്രസർക്കാർ പ്രതിനിധികളുമില്ല. ഹൈക്കോടതി വിധിക്ക് എതിരേ വഖഫ് ഭൂമി സംരക്ഷണസമിതി സുപ്രീംകോടതിയെ സമീപിച്ചിട്ടുണ്ട്. വഖഫ് ട്രൈബ്യൂണലിലും കേസ് നിലവിലുണ്ട്.
• സമരസമിതി പിളർന്നു റവന്യൂ അവകാശങ്ങൾ പൂർണ്ണമായും പുന:സ്ഥാപിച്ച് കിട്ടാത്തതിനാൽ തങ്ങൾ സമരം തുടരുമെന്ന് പുതിയതായി രൂപീകരിച്ച മുനമ്പം സമരസമിതിയുടെ പ്രസിഡന്റ് അഡ്വ. റോയ് കുരിശിങ്കൽ, സെക്രട്ടറി പ്രദീപ് മുത്തണ്ടാശ്ശേരി എന്നിവർ അറിയിച്ചു. സമരവേദിക്ക് പുറത്ത് ഇന്ന് സമരം ആരംഭിക്കും.
പോക്കുവരവ് നടത്തിതരുമെന്നും സുപ്രീം കോടതിയിലെ അപ്പീലിൽ സർക്കാർ കക്ഷി ചേരുമെന്നുമുള്ള ഉറപ്പ് ലഭിച്ചതിനാലാണ് സമരം അവസാനിപ്പിക്കുന്നതെന്ന് കൺവീനർ ജോസഫ് ബെന്നി കറുപ്പശ്ശേരി പറഞ്ഞു.