അങ്കമാലിയിൽ അങ്കം കുറിച്ച് 94 സ്ഥാനാർഥികൾ

അങ്കമാലി: അങ്കമാലി നഗരസഭയിൽ 31 വാർഡുകളിലായി ഇക്കുറി മത്സരിക്കുന്നത് 94 സ്ഥാനാർത്ഥികൾ. യു.ഡി.എഫും എൽ.ഡി.എഫും 31 വാർഡുകളിലും മത്സരിക്കുമ്പോൾ എൻ.ഡി.എ 22 വാർഡുകളിൽ മാത്രമാണ് മത്സരിക്കുന്നത്. നിലവിലെ കൗൺസിലിൽ യു.ഡി.എഫ് 15, എൽ.ഡി.എഫ് 10, ബി.ജെ.പി 2, സ്വതന്ത്രർ 3 എന്നിങ്ങനെയാണ് കക്ഷിനില. ബി.ജെ.പി ആദ്യമായാണ് കൗൺസിലിൽ എത്തിയത്. നഗരസഭയുടെ ചരിത്രത്തിൽ കാലുമാറ്റവും കൂറുമാറ്റവും ഇല്ലാതെ ഭരണ കാലാവധി പൂർത്തിയാക്കുന്ന ആദ്യ യു.ഡി.എഫ് ഭരണസമിതിയാണ് ഇപ്പോഴത്തേത്. എൽ.ഡി.എഫിനെ സംബന്ധിച്ചിടത്തോളം നിലവിലെ കൗൺസിലിൽ പത്ത് അംഗം കൊണ്ട് തൃപ്തിപ്പെടേണ്ടി വന്നു. യു.ഡി.എഫിൽ നിലവിലെ കൗൺസിലിൽ ചെയർമാന്മാരായിരുന്ന മൂന്ന് പേർ ഉൾപ്പെടെ പല നേതാക്കൾക്കും ഇക്കുറി സീറ്റില്ല. എൻ.ഡി.എ രണ്ട് സിറ്റിംഗ് സീറ്റിൽ കടുത്ത വെല്ലുവിളി നേരിടുകയാണ്. നാല് വാർഡുകളിൽ മുന്നണി സ്ഥാനാർത്ഥികൾക്ക് കടുത്ത വെല്ലുവിളി ഉയർത്തി സ്വതന്ത്രന്മാർ രംഗത്തുണ്ട്. യു.ഡി.എഫ് ഭരണം നിലനിർത്താനുള്ള പോരാട്ടത്തിലാണ്. ഇത്തവണ ഭരണമുറപ്പിക്കാൻ കടുത്ത ശ്രമത്തിലാണ് എൽ.ഡി.എഫ്. നിലവിൽ തുറന്നു കിട്ടിയ അക്കൗണ്ടിന് പുറമേ പുതിയ വാർഡുകളിലേക്ക് ചേക്കേറാനാകുമെന്ന പ്രതീക്ഷയിലാണ് എൻ.ഡി.എ. മൂന്ന് മുന്നണികളും അങ്കം കുറിച്ച അങ്കമാലിയിൽ സ്വതന്ത്രന്മാർ നിർണായകമാകാനുള്ള സാദ്ധ്യത തള്ളാനാകില്ല.