കളമശ്ശേരിയിൽ കുറ്റിക്കാട്ടിലെ ചതുപ്പിൽ മൃതദേഹം: സൂരജ് ലാമയുടേതെന്ന് സംശയം

കൊച്ചി: രണ്ടരമാസം മുമ്പ് കാണാതായ ബംഗളൂരു സ്വദേശി സൂരജ് ലാമയുടേതെന്ന് (59) കരുതുന്ന മൃതദേഹം കളമശ്ശേരി എച്ച്.എം.ടി കമ്പനി​ക്ക് എതിർവശത്തെ കാടുമൂടിയ പ്രദേശത്തെ ചതുപ്പിൽ ഇന്നലെ പൊലീസ് കണ്ടെത്തി. പ്രധാന റോഡിൽനിന്ന് 100 മീറ്റർ അകലെ തിരിച്ചറിയാൻ കഴിയാത്തവിധം അഴുകി​യ നി​ലയി​ലാണ് ഒന്നരമാസം പഴക്കമുള്ള മൃതദേഹം. ചതുപ്പിൽ കമഴ്ന്നുകിടക്കുന്ന നിലയിലായിരുന്നു. ഒരു കാൽ ചതുപ്പിലാണ്ട് വെള്ളക്കെട്ടിലേക്ക് വീണതാണെന്ന് കരുതുന്നു. ആലുവ ഡിവൈ.എസ്.പി പി​.പി​. രാജേഷി​ന്റെ നേതൃത്വത്തിലുള്ള 27അംഗ സംഘവും ഫയർഫോഴ്സ് ആർ.ആർ.ടിയും ചേർന്നായിരുന്നു തെരച്ചി​ൽ.

കുവൈറ്റിൽനിന്ന് നാടുകടത്തിയ സൂരജ് ലാമയെ ഒടുവിൽ കണ്ടത് ഇവിടെയാണ്. സി.സി ടിവി ദൃശ്യവും പൊലീസിന് ലഭിച്ചിരുന്നു. സൂരജ് ലാമയുടെ ഏകമകൻ സാന്റോൺ ലാമയെ ബംഗളൂരുവിൽനിന്ന് വിളിച്ചുവരുത്തി ഡി.എൻ.എ പരിശോധനയ്ക്കായി ഇന്നലെ രക്തസാമ്പിൾ ശേഖരിച്ചു. ബന്ധു അഗ്നിക് റോയിയും ഒപ്പമുണ്ട്. കളമശ്ശേരി മെഡിക്കൽ കോളേജ് മോർച്ചറിയിൽ സൂക്ഷിച്ചിട്ടുള്ള മൃതദേഹം ഇന്ന് പോസ്റ്റ്മോർട്ടം ചെയ്യും. കളമശ്ശേരി പൊലീസ് കേസെടുത്തു.

കൊൽക്കത്തയിൽ വേരുകളുള്ള ബംഗളൂരു സ്വദേശി സൂരജ് ലാമയ്ക്ക് കുവൈറ്റിൽ ഹോട്ടൽ ബിസിനസായിരുന്നു. അവി​ടെ വ്യാജ മദ്യദുരന്തത്തി​ൽ ഓർമ്മ നഷ്ടപ്പെട്ട ലാമയെ വിസ കാലാവധി കഴിഞ്ഞപ്പോൾ അധി​കൃതർ ബംഗളൂരുവി​ലേക്ക് അയയ്ക്കുന്നതി​ന് പകരം കൊച്ചി​യി​ലേക്ക് കയറ്റി​വി​ട്ടു. ഒക്ടോബർ ആറി​നാണ് ഇവി​ടെയെത്തി​യത്. യാത്ര ബന്ധുക്കൾ അറിഞ്ഞിരുന്നില്ല. ഫീഡർ ബസിൽ ആലുവയി​ൽ വന്ന ലാമയെ പൊലീസ് കളമശ്ശേരി മെഡിക്കൽ കോളേജിൽ എത്തിച്ചു. അവിടെനിന്ന് കാണാതായി. പിതാവിനെ കണ്ടെത്താൻ മകൻ സാന്റോൺ നടത്തിയ അന്വേഷണം വലിയ വാർത്തയായി. സാന്റോൺ ഹൈക്കോടതിയെ സമീപിച്ചതോടെ പ്രത്യേക അന്വേഷണസംഘത്തെ നിയോഗിച്ചു.

ഹൈക്കോടതി​യുടെ കർശന നി​ർദ്ദേശത്തെ തുടർന്ന് ഒക്ടോബർ 26 മുതൽ ലാമയെ തേടുകയായി​രുന്നു. ശബരി​മല ഉൾപ്പെടെ തീർത്ഥാടന കേന്ദ്രങ്ങളി​ലും പരി​ശോധി​ച്ചു. 120 പൊലീസുകാർവരെ തെരച്ചി​ൽ നടത്തി​യ ദി​വസങ്ങളുണ്ട്. രണ്ടാംഘട്ട പരിശോധന ഇന്നലെയാണ് ആരംഭിച്ചത്.