'കേരള മട്ട' കയറ്റുമതി: കേന്ദ്ര പദ്ധതി പാളി പ്രശ്നമായത് കമ്മിഷൻ തുക
തൃശൂർ: സംസ്ഥാനത്തെ കർഷകരിൽ നിന്ന് നെല്ല് സംഭരിച്ച് അരിയാക്കി 'കേരള മട്ട' എന്ന പേരിൽ വിദേശത്തേക്ക് കയറ്റി അയയ്ക്കാനുള്ള കേന്ദ്ര പദ്ധതി തുടക്കത്തിലേ പാളി. കേന്ദ്ര ഏജൻസിയായ നാഷണൽ കോ- ഓപ്പറേറ്റീവ് കൺസ്യൂമേഴ്‌സ് ഫെഡറേഷൻ ഇതിനുള്ള പ്രാരംഭ പ്രവർത്തനം തുടങ്ങിയിരുന്നു. എന്നാൽ, മറ്റൊരു കേന്ദ്ര ഏജൻസിയായ നാഷണൽ കോ- ഓപ്പറേറ്റീവ് എക്‌സ്‌പോർട്‌സ് (എൻ.സി.എൽ) ഒരുകിലോ അരിയുടെ കയറ്റുമതിക്ക് അഞ്ചുരൂപ കമ്മിഷൻ ചോദിച്ചതോടെ പദ്ധതി മുന്നോട്ടു കൊണ്ടുപോകാനായില്ല.
പദ്ധതിയെ ഇത് നഷ്ടത്തിലാക്കുമെന്നതു കൊണ്ടാണിത്. പദ്ധതി താത്കാലികമായി മരവിപ്പിച്ചു. സംഭരിക്കുന്ന നെല്ലിന്റെ വില മൂന്നു ദിവസത്തിനകം നേരിട്ട് കർഷകരുടെ അക്കൗണ്ടിലെത്തിക്കുന്ന വിധത്തിലായിരുന്നു പദ്ധതി. താങ്ങുവില കിലോയ്ക്ക് 23.69 രൂപയാണെങ്കിലും 25 രൂപയ്ക്ക് സംഭരിക്കുമെന്നായിരുന്നു പറഞ്ഞിരുന്നത്.
നെൽകർഷകർക്ക് ഗുണം കിട്ടുമെന്നതിനാൽ പദ്ധതിക്ക് സംസ്ഥാന സർക്കാരും എതിർപ്പ് പ്രകടിപ്പിച്ചിരുന്നില്ല. അതേസമയം, എൻ.സി.എൽ നിലപാടിനുപിന്നിൽ ചില രാഷ്ട്രീയ പാർട്ടികളുടെ ഇടപെടലുണ്ടെന്നാണ് ആക്ഷേപം. മദ്ധ്യപ്രദേശ്, ഛത്തീസ്ഗഢ് എന്നിവിടങ്ങളിൽ പദ്ധതി നടപ്പാക്കുന്നുണ്ട്.
പദ്ധതി സമർപ്പിച്ചത്
നെൽകർഷകർ
പാലക്കാട്ടെയും തൃശൂരിലെയും ഒരുകൂട്ടം നെൽക്കർഷകരാണ് പദ്ധതി കേന്ദ്രത്തിനു സമർപ്പിച്ചത്. മൂന്നുമാസം മുമ്പ് ഉദ്യോഗസ്ഥർ തൃശൂർ, പാലക്കാട്, ആലപ്പുഴ ജില്ലകളിലെ നെൽപ്പാടങ്ങൾ സന്ദർശിച്ച് കർഷകരുമായി ചർച്ച നടത്തിയിരുന്നു. വിദേശ രാജ്യങ്ങളിലെ മലയാളികളെ ലക്ഷ്യമിട്ടായിരുന്നു പദ്ധതി.
50,000 ടൺ
ആദ്യഘട്ടം കയറ്റുമതിക്ക്
ലക്ഷ്യമിട്ടിരുന്നത്
''നെൽകർഷകർക്ക് ഉടൻ പണം കിട്ടുമെന്നതായിരുന്നു പദ്ധതിയുടെ മേന്മ. എന്തിനാണ് പദ്ധതി തകർത്തതെന്ന് അറിയില്ല
-എം.വി. രാജേന്ദ്രൻ, സി.ഇ.ഒ, പാഡി പ്രൊഡ്യൂസിംഗ്
ഫോർ ഫാർമേഴ്‌സ് കമ്പനി