മുനമ്പം വഖഫ് ഭൂമി: ഒരു സമരം തീർന്നു, മറ്റൊന്ന് തുടങ്ങി

വൈപ്പിൻ: വഖഫ് ബോർഡ് തങ്ങളുടെ ഭൂമി കൈവശപ്പെടുത്തുന്നതിനെതിരെ മുനമ്പം വേളാങ്കണ്ണിമാതാ പള്ളിമുറ്റത്ത് 415 ദിവസമായി നടത്തിവന്ന റിലേ നിരാഹാരസമരം ഇന്നലെ അവസാനിപ്പിച്ചു. ഇതിൽ പ്രതിഷേധിച്ച് പള്ളിക്കു പുറത്ത് ഒരുക്കിയ പന്തലിൽ ഒരുവിഭാഗം പുതിയ സമരം ആരംഭിച്ചു. നിയമമന്ത്രി പി. രാജീവ് നൽകിയ നാരങ്ങാനീര് കുടിച്ച് 25ഓളം സമരസേനാനികളാണ് സമരം അവസാനിപ്പിച്ചത്. റവന്യൂമന്ത്രി കെ. രാജൻ, എം.എൽ.എമാരായ കെ. എൻ. ഉണ്ണിക്കൃഷ്ണൻ (വൈപ്പിൻ), ജോബ് മൈക്കിൾ (ചങ്ങനാശേരി) എന്നിവരും പങ്കെടുത്തു.

മന്ത്രിമാർ എത്തിയപ്പോഴാണ് സമരംനിറുത്തുന്നതിനെ എതിർക്കുന്ന വിഭാഗം മുദ്രാവാക്യം വിളികളുമായി അവിടെ നിന്നിറങ്ങിപ്പോയത്. ഇവരുടെ സമരം ലിസി ആന്റണി ഉദ്ഘാടനം ചെയ്തു. പുതിയ സമരസമിതിയുടെ പ്രസിഡന്റ് അഡ്വ. റോയ് കുരിശിങ്കൽ, സെക്രട്ടറി പ്രദീപ് മുത്തണ്ടാശേരി, ജിൻസി, ആന്റണി ലൂയിസ് തുടങ്ങിയവർ സംസാരിച്ചു. ബി.ജെ.പി അനുകൂലികളാണ് ഇവർ.

ആദ്യസമരസമിതിയിലെ രണ്ട് രക്ഷാധികാരികളിൽ ഒരാളായ എസ്.എൻ.ഡി.പി യോഗം മുനമ്പം ശാഖാ പ്രസിഡന്റ് കെ.എൻ. മുരുകൻ പള്ളിയിലെ സമരസമാപനച്ചടങ്ങ് ബഹിഷ്കരിച്ചു. സമരം നിറുത്തുന്നതിനോട് എതിർപ്പില്ലെങ്കിലും വേണ്ടത്ര കൂടിയാലോചന നടത്താതെ ഏകപക്ഷീയമായാണ് തീരുമാനമെന്ന് അദ്ദേഹം പറഞ്ഞു. വേളാങ്കണ്ണി പള്ളി വികാരി ഫാ. ആന്റണി സേവ്യർ തറയിലാണ് മറ്റൊരു രക്ഷാധികാരി. ഭൂസംരക്ഷണ സമിതി ചെയർമാൻ ജോസഫ് പാലക്കൽ, കൺവീനർ ജോസഫ് ബെന്നി കറുപ്പശേരി തുടങ്ങിയവർ സംബന്ധിച്ചു.

രാഷ്ട്രീയം നോക്കിയല്ല തീരുമാനം

സുപ്രീംകോടതിയിലെ അപ്പീലിൽ മുനമ്പത്തുകാർക്കുവേണ്ടി സർക്കാർ കക്ഷിചേരുമെന്ന് മന്ത്രി പി. രാജീവ് പറഞ്ഞു. വിലകൊടുത്ത് വാങ്ങിയ ഭൂമിയിൽ മുനമ്പത്തെ 610 കുടുംബങ്ങൾക്കും അവകാശമുണ്ടെന്നും അവരെ അവിടെനിന്ന് കുടിയിറക്കില്ലെന്നുമുള്ള നിലപാടാണ് തുടക്കംമുതൽ സംസ്ഥാന സർക്കാർ സ്വീകരിച്ചത്. നിയമപരമായ നൂലാമാലകൾ മറികടക്കാൻ സമയമെടുക്കും എന്നതിനാലാണ് ജസ്റ്റിസ് രാമചന്ദ്രൻ കമ്മീഷനെ നിയമിച്ചത്. രാഷ്ട്രീയം നോക്കിയല്ല സർക്കാർ ഇക്കാര്യത്തിൽ നിലപാടെടുക്കുന്നതെന്ന് റവന്യൂമന്ത്രി കെ. രാജൻ പറഞ്ഞു.

സമരം അവസാനിപ്പിച്ചത് താത്കാലികം

മുനമ്പം ഭൂസമരം അവസാനിപ്പിക്കുന്നത് താത്കാലികമായാണെന്നും ശാശ്വത പരിഹാരം ഉണ്ടായില്ലെങ്കിൽ വീണ്ടും സമരവുമായി രംഗത്തിറങ്ങുമെന്നും രക്ഷാധികാരി ഫാ. ആന്റണി സേവ്യർ പറഞ്ഞു.