അഞ്ച് വയസുകാരൻ ഒറ്റയ്ക്ക് സഞ്ചരിച്ചത് മൂന്ന് കിലോമീറ്റർ!

നെടുമ്പാശേരി: പുറയാറിലെ വീട്ടിൽനിന്ന് ആരുമറിയാതെ അഞ്ച് വയസുകാരൻ ഇറങ്ങി സഞ്ചരിച്ചത് മൂന്ന് കിലോമീറ്റർ ദൂരം. പരിഭ്രാന്തരായ ബന്ധുക്കൾ തെരച്ചിൽ നടത്തുന്നതിനിടെ ദേശം മംഗലപ്പുഴ പാലത്തിന് സമീപത്തുനിന്ന് കുട്ടിയെ കണ്ടെത്തി.

ഇന്നലെ വൈകിട്ട് നാലോടെ വീട്ടുമുറ്റത്ത് കളിക്കുകയായിരുന്ന കുട്ടിയെ കാണാതാവുകയായിരുന്നു. വീട്ടുകാർ പരിസരമാകെ തെരഞ്ഞെങ്കിലും കണ്ടെത്താനായില്ല. തുടർന്ന് നെടുമ്പാശേരി പൊലീസിൽ അറിയിച്ചു. പൊലീസും തെരച്ചിൽ ഊർജിതമാക്കി. പെരിയാറും റെയിൽവേ പാളവുമെല്ലാമുള്ള പ്രദേശമായതിനാൽ എല്ലാവർക്കും ആശങ്കയിലായിരുന്നു. ഇതിനിടയിൽ മംഗലപ്പുഴ പാലത്തിന് സമീപം ധാബാ ഹോട്ടലിലെ സെക്യൂരിറ്റി ജീവനക്കാരനാണ് കുട്ടിതനിച്ചുവരുന്നത് കണ്ടത്.

പിടിച്ചുനിറുത്തി സംസാരിച്ചശേഷം പൊലീസിനെ അറിയിച്ചു. ദേശം - കാലടി റോഡിലൂടെ സഞ്ചരിച്ച കുട്ടി പിന്നീട് ദേശീയപാതയിലുടെ പോകുമ്പോഴാണ് പിടിയിലായത്. പൊലീസ് കുട്ടിയിൽനിന്ന് വിവരങ്ങൾ ചോദിച്ചറിഞ്ഞശേഷം രക്ഷിതാക്കൾക്ക് കൈമാറി.