പത്രവിതരണം തപസ്യയാക്കി വി.മുരളീധരൻ

കൊല്ലം: കേരളകൗമുദി വലിയകുളങ്ങര ഏജന്റ് വി.മുരളീധരന് പത്രവിതരണം തപസ്യയാണ്. പുലർച്ചെ മൂന്നിന് ഉണർന്ന് പത്രക്കെട്ട് എടുക്കാൻ പോകും. ഏഴോടെ വിതരണം പൂർത്തിയാക്കും. പിന്നെ വരിസംഖ്യ ശേഖരണവും പുതിയ വരിക്കാരെ കണ്ടെത്തലും. ഇങ്ങനെ ജനങ്ങൾക്ക് അറിവ് പകർന്നുനൽകുന്നതിനായി ജീവിതം സമർപ്പിച്ചിരിക്കുകയാണ് വി.മുരളീധരൻ.

പഠനം പൂർത്തിയായതിന് പിന്നാലെ വി.മുരളീധരന് പഞ്ചാബിൽ ടയർ കമ്പനിയൽ ജോലി ലഭിച്ചു. 41 വർഷം മുമ്പ് ഇന്ദിരാഗാന്ധി കൊല്ലപ്പെട്ടതോടെ പഞ്ചാബിൽ കലാപം പൊട്ടിപ്പുറപ്പെട്ടു. ദിവസങ്ങളോളം താമസ്ഥലത്ത് നിന്ന് പുറത്തിറങ്ങാതെ കഴിച്ചുകൂട്ടി. ഇതിനിടയിൽ കലാപത്തിന് അല്പം അയവുണ്ടായതോടെ നാട്ടിലേക്ക് മടങ്ങുകയായിരുന്നു. എന്ത് തൊഴിലെടുക്കുമന്ന് ചിന്തിച്ച് നിന്ന മുരളീധരനോട് ബന്ധുവാണ് പത്ര ഏജൻസി എടുക്കാൻ ഉപദേശിച്ചത്. അങ്ങനെ പേട്ടയിൽ പോയി കേരളകൗമുദി ഏജൻസി എടുത്ത്, ഒപ്പം പുത്തൻ സൈക്കിളും വാങ്ങി പത്രവിതരണം ആരംഭിക്കുകയായിരുന്നു. എട്ട് വർഷം മുമ്പ് വരെ സൈക്കിളിലായിരുന്നു പത്രവിതരണം. ഇപ്പോൾ എം.എ.ടിയിലാണ്. മകനും മരുമകനും പത്രവിതരണത്തിൽ സഹായികളായുണ്ട്.

പത്ര ഏജൻസിയിൽ നിന്നുള്ള വരുമാനം കൊണ്ടാണ് മുരളീധരൻ ജീവിതം പടുത്തുയർത്തിയത്. എല്ലാദിവസവും നാട്ടുകാരെ മുഴുവൻ കാണാനും മിണ്ടാനും കഴിയുന്നു. അത് നൽകുന്ന ആത്മസംതൃപ്തി പറഞ്ഞറിയിക്കാനാകാത്തതാണെന്നും വി.മുരളീധരൻ പറഞ്ഞു. കൊല്ലം ജില്ലയ്ക്ക് പുറമേ ആലപ്പുഴയിലും ഏജൻസിയുണ്ട്. പ്രയാർ വടക്ക് മഞ്ജുഭവനത്തിലാണ് താമസം. ഭാര്യ സുജാത കയർ തൊഴിലാളിയാണ്. മഞ്ജു, മനു എന്നിവർ മക്കളും സന്തോഷ് കുമാർ, സൂര്യ എന്നിവർ മരുമക്കളുമാണ്. ആദിത്യമോൾ, അനാമിക, ആദിദേവ് എന്നിവർ കൊച്ചുമക്കൾ.