'രാഹുൽ  മാങ്കൂട്ടത്തിൽ അടുത്ത സുഹൃത്ത് മാത്രം'; ഒളിവിൽ  പോകാൻ  കാർ നൽകിയ നടിയിൽ നിന്ന് വിവരങ്ങൾ തേടി പൊലീസ്

പാലക്കാട്: ഒളിവിൽ പോകാൻ രാഹുൽ മാങ്കൂട്ടത്തിൽ എംഎൽഎ ഉപയോഗിച്ച ചുവന്ന പോളോ കാർ നൽകിയ സിനിമ നടിയിൽ നിന്ന് വിവരങ്ങൾ തേടി പൊലീസ്. ഫോണിൽ വിളിച്ചാണ് കാർ നൽകിയതുമായി ബന്ധപ്പെട്ട വിവരങ്ങൾ പൊലീസ് തേടിയത്. രാഹുൽ മാങ്കൂട്ടത്തിൽ അടുത്ത സുഹൃത്താണെന്നാണ് നടി പൊലീസിന് നൽകിയ മറുപടി. ബംഗളൂരുവിലാണ് നിലവിൽ നടിയുള്ളത്. രാഹുലിനെതിരെ കേസെടുക്കുന്നതിന് ദിവസങ്ങൾക്ക് മുൻപ് രാഹുലിന്റെ ഭവന നിർമ്മാണ പദ്ധതി ഉദ്ഘാടനം ചെയ്യാനെത്തിയ നടിയുടേതാണ് രക്ഷപ്പെടാൻ ഉപയോഗിച്ച ചുവന്ന കാർ എന്നാണ് പൊലീസ് കണ്ടെത്തൽ.

കഴിഞ്ഞ ബുധനാഴ്ച മുതൽ ഈ കാർ പാലക്കാടുണ്ടായിരുന്നു. രാഹുൽ മാങ്കൂട്ടത്തിലിന്റെ പേഴ്സണൽ സ്റ്റാഫിനെയും ഡ്രൈവറെയും ചോദ്യം ചെയ്തതിൽ നിന്നാണ് അന്വേഷണ സംഘത്തിന് നിർണായക വിവരം ലഭിച്ചത്. രാഹുൽ മാങ്കൂട്ടത്തിൽ പാലക്കാട്ട് നിന്ന് രക്ഷപ്പെട്ട കാറിനെക്കുറിച്ചുള്ള വിവരങ്ങൾ അന്വേഷണ സംഘത്തിന് നേരത്തെ ലഭിച്ചിരുന്നു. രാഹുലിന്റെ സുഹൃത്തും കേസിലെ രണ്ടാം പ്രതിയുമായ ജോബി ജോസഫും ഒപ്പമുണ്ടെന്നും അന്വേഷണ സംഘം സംശയിക്കുന്നു.

പാലക്കാട് നിന്ന് ചുവന്ന പോളോ കാറിൽ രാഹുൽ നേരെ പോയത് പൊള്ളാച്ചിയിലേക്കാണെന്നാണ് ഇന്നലെ അന്വേഷണ സംഘത്തിന് ലഭിച്ച വിവരം. ഇതിനുശേഷം ഹെെവേ ഒഴിവാക്കി ജില്ലാ അതിർത്തിയായ കൊഴിഞാമ്പാറ വഴിയാണ് കോയമ്പത്തൂരിലേക്ക് കടന്നത്. കോയമ്പത്തൂരിൽ നിന്നാണ് കർണാടക - തമിഴ്നാട് അതിർത്തിയായ ബാഗല്ലൂരിൽ എത്തിയത്. ഞായറാഴ്ച മുതൽ ഇവിടെ റിസോർട്ടിൽ ഒളിച്ചുകഴിയുകയായിരുന്നു. ഇന്നലെ രാവിലെ അന്വേഷണ സംഘം ഇവിടെ എത്തുമെന്ന വിവരം അറിഞ്ഞതോടെ ഇവിടെ നിന്ന് മുങ്ങി. അവിടെ നിന്ന് കർണാടകയിലേക്ക് പോയെന്നാണ് വിവരം. കാറുകൾ മാറിമാറി ഉപയോഗിച്ചാണ് രാഹുൽ യാത്ര ചെയ്യുന്നത്.