'തിരുവനന്തപുരത്ത് 60 സീറ്റ് ലഭിക്കും'; എൽഡിഎഫ് ഉജ്ജ്വല വിജയം നേടുമെന്ന് ശിവൻകുട്ടി

തിരുവനന്തപുരം: തദ്ദേശതിരഞ്ഞെടുപ്പിൽ എൽഡിഎഫ് ഉജ്ജ്വല വിജയം നേടുമെന്ന് വിദ്യാഭ്യാസ വകുപ്പ് മന്ത്രി വി ശിവൻകുട്ടി. തിരുവനന്തപുരത്ത് എൽഡിഎഫിന് 55നും 60നും ഇടയിൽ സീറ്റ് ലഭിക്കുമെന്നും അദ്ദേഹം പറഞ്ഞു. തിരുവനന്തപുരം ജില്ലയെ സംബന്ധിച്ചിടത്തോളം അത്യുജ്ജ്വലമായ വിജയമാണ് ഉണ്ടാകാൻ പോകുന്നതെന്നും അദ്ദേഹം കൂട്ടിച്ചേർത്തു.

'പൊതുവെ സംസ്ഥാനത്താകെ ഇടതുപക്ഷ ജനാധിപത്യ മുന്നണിക്ക് അനുകൂലമായ തരംഗമാണ് കാണാൻ സാധിക്കുന്നത്. സാധാരണ ഗതിയിൽ ഒരു സർക്കാർ ഇരിക്കുന്ന സമയത്ത് നടക്കുന്ന തിരഞ്ഞെടുപ്പ് ആകുമ്പോള്‍ ഭരണ വിരുദ്ധ വികാരം ഉണ്ടാകാൻ സാദ്ധ്യതയുണ്ടല്ലോ?എന്നാൽ പ്രവര്‍ത്തകര്‍ വീടുകളിൽ പോകുന്ന സമയത്ത് അങ്ങനെയൊരു വികാരം ഒരിടത്തും ഉണ്ടായിട്ടില്ല. എല്ലാവരും വളരെ സംതൃപ്തരാണ്. തിരുവനന്തപുരം ജില്ലയെ സംബന്ധിച്ചിടത്തോളം അത്യുജ്ജ്വലമായ വിജയമാണ് ഉണ്ടാകാൻ പോകുന്നത്. കഴിഞ്ഞ അസംബ്ലി തിരഞ്ഞെടുപ്പിൽ 14ൽ 13 സീറ്റും ഇടതുപക്ഷ ജനാധിപത്യ മുന്നണി നേടിയിരുന്നു. അന്നത്തെ രാഷ്ട്രീയ സാഹചര്യത്തേക്കാള്‍ കുറച്ചുകൂടി മെച്ചപ്പെട്ട സാഹചര്യമാണ് ഇടതുപക്ഷ ജനാധിപത്യ മുന്നണിക്ക് ഇപ്പോഴുള്ളത്'- ശിവൻകുട്ടി പറഞ്ഞു.

അതേസമയം, തദ്ദേശതിരഞ്ഞെടുപ്പിന്റെ വോട്ടെണ്ണൽ ഇന്ന് രാവിലെ എട്ടുമണിയോടെ ആരംഭിച്ചു. പത്തുമണിക്ക് മുൻപ് തന്നെ ഏകദേശ ചിത്രം തെളിയാനാണ് സാദ്ധ്യത. വോട്ടെണ്ണൽ ആരംഭിച്ച് നിമിഷങ്ങൾ പിന്നിടുമ്പോൾ തന്നെ എൽഡിഎഫ് പലയിടങ്ങളിലും ലീഡ് നിലനിർത്തുന്നുണ്ട്.