ട്രെയിൻ യാത്രക്കാർക്ക് സന്തോഷ വാർത്ത,​ പുതിയ തീരുമാനം പ്രഖ്യാപിച്ച് റെയിൽവേ

പാലക്കാട്: ക്രിസ്മസ് അവധി, ആഴ്ചാവസാന തിരക്കുകൾ പരിഗണിച്ച് മംഗളൂരുവിൽ നിന്ന് ഷൊർണൂരിലേക്ക് ഇന്ന് അൺറിസർവ്‌ഡ് സ്പെഷ്യൽ ട്രെയിൻ അനുവദിച്ച് ദക്ഷിണ റെയിൽവേ. മംഗളൂരു സെൻട്രൽ-ഷൊർണൂർ ജംഗ്ഷൻ വൺവേ അൺറിസർവ്‌ഡ്(നമ്പർ 06131) സ്പെഷ്യൽ ട്രെയിൻ ഇന്ന് വൈകിട്ട് 6ന് മംഗളൂരുവിൽ നിന്ന് പുറപ്പെട്ട് രാത്രി 12.30ന് ഷൊർണൂരിലെത്തും. 5 ചെയർകാർ, 13 ജനറൽ സെക്കൻഡ് ക്ലാസ് കോച്ച്, 2 സെക്കൻഡ് ക്ലാസ് കം ബ്രേക്ക് വാൻ കോച്ച് എന്നിവയാണ് സ്പെഷ്യൽ ട്രെയിനിൽ ഉണ്ടാവുക.

കാസർകോഡ‌്(വൈകിട്ട് 6.38), കാഞ്ഞങ്ങാട്(7.04), നീലേശ്വരം(7.13), ചെറുവത്തൂർ(7.20), പയ്യന്നൂർ(7.31), പഴയങ്ങാടി(7.44), കണ്ണൂർ(8.17), തലശ്ശേരി(8.38), മാഹി(8.49), വടകര(9.04), കൊയിലാണ്ടി(9.24), കോഴിക്കോട്(9.52), ഫറൂഖ്(10.09), തിരൂർ(10.38), കുറ്റിപ്പുറം(10.59) എന്നിവിടങ്ങളിൽ ട്രെയിനിന് സ്റ്റോപ്പ് ഉണ്ട്.

 അധിക കോച്ചുകളും

ക്രിസ്മസ് അവധിക്ക് ഏറ്റവുമധികം യാത്രാത്തിരക്കുള്ള ദിവസങ്ങളിൽ ചില സ്ഥിരം ട്രെയിനുകളിൽ അധിക കോച്ചുകളും അനുവദിച്ചിട്ടുണ്ട്. ചെന്നൈ-മംഗളൂരു സെൻട്രൽ എക്സ്‌പ്രസിൽ(16159) ഡിസംബർ 23ന് ഒരു സ്ലീപ്പർ കോച്ച് അധികമായി അനുവദിച്ചു. ഡിസംബർ 21നും 25നും പുറപ്പെടുന്ന മംഗളൂരു സെൻട്രൽ-ചെന്നൈ എഗ്‌മോർ(16160) എക്സ്‌പ്രസിൽ ഒരു സ്ലീപ്പർ കോച്ച് അധികമായി അനുവദിച്ചു. ഡിസംബർ 23ന് പുറപ്പെടുന്ന തിരുവനന്തപുരം-കോഴിക്കോട് ജനശതാബ്ദി എക്സ്‌പ്രസിൽ(12076) ഒരു ചെയർകാർ അധികമായി അനുവദിച്ചു. ഡിസംബർ 23ന് പുറപ്പെടുന്ന കോഴിക്കോട്-തിരുവനന്തപുരം ജനശതാബ്ദി എക്സ്‌പ്രസിൽ(12075) ഒരു ചെയർകാർ അധികമായി അനുവദിച്ചതായും റെയിൽവേ പാലക്കാട് ഡിവിഷൻ അറിയിച്ചു.