പോക്‌സോ കേസ് പ്രതിക്ക് 99 മാസം കഠിനതടവും പിഴയും ശിക്ഷ

അടൂർ : പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ മധ്യവയസ്ക്കന് 99 മാസം കഠിനതടവും 81,000 രൂപ പിഴയും ശിക്ഷ വിധിച്ചു. കൊല്ലം പോരുവഴി ശാസ്താനട വലിയത്ത് പുത്തൻവീട്ടിൽ പ്രസാദിനെ (53) യാണ് ശി​ക്ഷി​ച്ചത്. അടൂർ ഫാസ്റ്റ് ട്രാക്ക് സ്‌പെഷ്യൽ കോടതി ജഡ്ജ് മഞ്ജിത്താണ് വിധി പ്രസ്ഥാപം നടത്തിയത്. 2023 ജൂലായ് 18നാണ് കേസിനാസ്പദമായ സംഭവം. പ്രതി പൂജയ്ക്കായി പെൺകുട്ടിയുടെ വീട്ടിലെത്തിയപ്പോൾ ലൈംഗിക അതിക്രമം നടത്തുകയായി​രുന്നു. അടൂർ പൊലീസ് സബ് ഇൻസ്‌പെക്ടർ ധന്യ.കെ.എസ് ആണ് അന്വേഷണം നടത്തി​യത്. പ്രോസിക്യൂഷൻ ഭാഗത്ത് നിന്ന് 14 സാക്ഷികളെ വിസ്തരിക്കുകയും 20 രേഖകൾ ഹാജരാക്കുകയും ചെയ്തു. പ്രോസിക്യൂഷനുവേണ്ടി സ്‌പെഷ്യൽ പബ്ലിക് പ്രോസിക്യൂട്ടർ അഡ്വ.സ്മിത ജോൺ.പി ഹാജരായി.