ഒരു മാമ്പഴത്തിന്റെ വില 19,000 രൂപ; വിദേശത്ത് നിന്ന് വരെ ആവശ്യക്കാർ ഏറെ

മലയാളികൾക്ക് പൊതുവെ ഇഷ്ടമുള്ള ഒരു പഴമാണ് മാമ്പഴം. എന്നാൽ 19,000 രൂപ കൊടുത്ത് ഒരു മാമ്പഴം വാങ്ങി കഴിച്ചിട്ടുണ്ടോ? കേൾക്കുമ്പോൾ അങ്ങനെയൊന്ന് ഉണ്ടോയെന്ന് തോന്നുമെങ്കിലും സംഭവം സത്യമാണ്. ജപ്പാനിലെ ഒരു അപൂർവ്വ പ്രീമിയം മാമ്പഴ ഇനത്തിനാണ് ഞെട്ടിക്കുന്ന ഈ വില.

ഹാകുഗിൻ നോ ടൈകോ എന്ന ബ്രാൻഡ് നാമത്തിൽ അറിയപ്പെടുന്ന ഈ മാമ്പഴത്തെ ഹിറോയുകി നകഗാവ എന്ന കർഷകൻ ഹൊക്കൈഡോ ദ്വീപിലെ ഒട്ടോഫുക്കിലുള്ള തന്റെ ഫാമിൽ വളർത്തിയെടുക്കുന്നതാണ്. ഒരു മാമ്പഴത്തിന് 230 ഡോളർ ( 18,910 ) വരെയാണ് ഈടാക്കുന്നത്. 2011 മുതലാണ് ഈ മാമ്പഴത്തിന്റെ കൃഷി ആരംഭിച്ചത്.

' മഞ്ഞിലെ സൂര്യൻ ' എന്നാണ് ഹാകുഗിൻ നോ ടൈകോയുടെ അർത്ഥം. ഗ്രീൻ ഹൗസിനുള്ളിലാണ് ഇവ വളർത്തിയെടുക്കുന്നത്. പുറത്ത് ശൈത്യ കാലാവസ്ഥയാണെങ്കിലും മിതമായ അന്തരീക്ഷത്തിൽ പ്രത്യേക രീതിയിലാണ് ഈ മാമ്പഴത്തിന്റെ കൃഷി രീതി. ശൈത്യകാലത്ത് -8 ഡിഗ്രി സെൽഷ്യസിലേക്ക് വരെ താപനില താഴുമ്പോൾ ഗ്രീൻ ഹൗസിനുള്ളിൽ 36 ഡിഗ്രി സെൽഷ്യസായിരിക്കും.

ചൂടുകാലത്ത് നേർ വിപരീതമായിരിക്കും. ഇവയിൽ കീടനാശിനികൾ ഉപയോഗിക്കാറില്ല. ആഡംബര റെസ്റ്റോറന്റുകളും സെലിബ്രിറ്റി ഷെഫുകളും കേക്ക്, ഡെസേർട്ട് തുടങ്ങിയവയുടെ നിർമ്മാണത്തിന് ഇവ ഉപയോഗിക്കുന്നുണ്ട്.അതീവ രുചികരമായ ഈ മാമ്പഴത്തിന് സ്വദേശത്ത് നിന്നും വിദേശത്ത് നിന്നും നേരിട്ടും വെബ്സൈറ്റിലൂടെയും ഏറെ ആവശ്യക്കാരാണ് എത്തുന്നത്.