ഇങ്ങനെപോയാൽ കേരളത്തിലെ ഈ സ്ഥാപനങ്ങൾ ഉടൻ അടച്ചുപൂട്ടും,​ പ്രതിസന്ധിക്ക് പിന്നിൽ

കോട്ടയം : നിത്യോപയോഗ സാധനങ്ങൾക്കൊപ്പം വാണിജ്യാവശ്യങ്ങൾക്കുള്ള പാചകവാതക വിലയും കുതിച്ചു കയറിയതോടെ ഹോട്ടൽ വ്യവസായം പ്രതിസന്ധിയിൽ. ഇന്നലെ കൊമേഴ്സ്യൽ എൽപി.ജി വില ഒറ്റയടിയ്‌ക്ക് 111 രൂപയാണ് കൂട്ടിയത്.ഒരു വർഷത്തിനുള്ളിൽ ഒരു തവണ കുറച്ചപ്പോൾ നാലു തവണ വർദ്ധിപ്പിച്ചു.

ആറുമാസമായി ഇറച്ചിക്കോഴി വില 145 - 160 നിരക്കിലാണ്. കോഴിമുട്ടയ്‌ക്ക് 7.50 - 8 രൂപ വരെയെത്തി. മാട്ടിറച്ചി കിലോയ്‌ക്ക് 420 - 460 വരെയെത്തി. മുന്തിയ ഇനം മീനുകൾക്ക് കിലോയ്‌ക്ക് 1000 രൂപയ്‌ക്ക് മുകളിലാണ്. വെളിച്ചെണ്ണ വില 400 - 450 ലും മറ്റ് എണ്ണകൾക്ക് 300 രൂപ വരെയെത്തി. ഉഴുന്ന്, പയർ, പരിപ്പ് , അരിവില കൂടി. പച്ചക്കറി വിലയിലും വൻതോതിൽ വർദ്ധനവുണ്ടായി. കിലോയ്‌ക്ക് 60 രൂപയിൽ മുകളിലാണ് ഭൂരിഭാഗത്തിനും വില. ശബരിമല സീസണായതിനാൽ സർക്കാർ നിശ്ചയിക്കുന്ന വിലയേ ഈടാക്കാനാവൂ.

ഒറ്റയടിയ്‌ക്ക് വില കൂട്ടാനാകില്ല

ഒറ്റയടിക്ക് ഹോട്ടൽ ഭക്ഷണങ്ങൾക്ക് വില വർദ്ധിപ്പിച്ചാൽ കച്ചവടം കുറയുമോയെന്ന ആശങ്കയുമുണ്ട്. വെജിറ്റേറിയൻ ഊണിന് മീഡിയം ഹോട്ടലുകളിൽ 60 - 100 രൂപ വരെയും വിലക്കുറവുള്ള മീൻകറിയോടെയുള്ള നോൺ വെജിന് കുറഞ്ഞത് 80 -90 രൂപയും ഈടാക്കിയിരുന്നു. ഒരു മീഡിയം ഹോട്ടലിൽ അഞ്ച് സിലിണ്ടർ ഒരു ദിവസം ഉപയോഗിക്കേണ്ടിവരും. ദിവസം 500 രൂപയുടെയും, മാസം 15000 രൂപയുടെയും അധിക ചെലവാണ് ഈ ഇനത്തിലെന്ന് ഹോട്ടൽ ഉടമകൾ പറയുന്നു. സമീപകാലത്ത് 18 ഹോട്ടലുകൾ ജില്ലയിൽ അടച്ചു പൂട്ടി.

തൊഴിലാളി ക്ഷാമം രൂക്ഷം

കൂടുതലും അന്യസംസ്ഥാനത്ത് നിന്നുള്ളവരാണ് തൊഴിലാളികൾ. 1000-1500 രൂപയാണ് ദിവസക്കൂലി. മലയാളിയെങ്കിൽ തുക കൂടും. വാടകകെട്ടിടത്തിലാണെങ്കിൽ ഉയർന്ന വാടക നൽകണം. അന്യ സംസ്ഥാന തൊഴിലാളികൾ എസ്.ഐ.ആറുമായി ബന്ധപ്പെട്ടും വടക്കു കിഴക്കൻ സംസ്ഥാനങ്ങളിൽ തിരഞ്ഞെടുപ്പ് അടുത്തതിനാലും മിക്കവരും നാട്ടിൽ ഉടൻ പോകും. ഇതോടെ തൊഴിലാളിക്ഷാമം രൂക്ഷമാകും.



''ലൈസൻസും ഫീസും മറ്റ് വൻ ചാർജുകളും നൽകി ഹോട്ടലുകൾ പ്രവർത്തിക്കുമ്പോഴാണ് ഇവയൊന്നുമില്ലാതെ റോഡരികിൽ പടുതയും വലിച്ചു കെട്ടി അനധികൃത കച്ചവടക്കാർ പണം കൊയ്യുന്നത്. ഇക്കാര്യത്തിലും സർക്കാർ ഇടപെടണം. -ഷാഹുൽ ഹമീദ് (ഹോട്ടൽ ആൻഡ് റെസ്റ്റോറന്റ് അസോസിയേഷൻ ജില്ലാ സെക്രട്ടറി )